Ўзбекистоннинг барча ҳудудларида 4—10 октябрь кунлари «Кексаларни эъзозлаш, уларга ҳурмат-эҳтиром кўрсатиш — халқимизга хос эзгу фазилат» ғояси остида «Кексалар ҳафталиги» ўтказилиши режалаштирилмоқда. Бу ҳақда 21 сентябрда ўтказилган брифингда Маҳалла ва оилани қўллаб-қувватлаш вазирлиги масъул ходими Фарҳод Эшмўминов маълум қилди.
Унинг билдиришича, Вазирлар Маҳкамасининг «Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисида»ги қарорига асосан ҳар йили октябрь ойининг биринчи ҳафтасида республика миқёсида «Кексалар ҳафталиги»ни ўтказиш белгиланган.
4—10 октябрь кунларига режалаштирилаётган ушбу ҳафталик доирасида жойларда қатор маънавий-маърифий, спорт, ободонлаштириш ва хайрия тадбирлари ўтказилиши белгиланган.
Хусусан, ҳафталик доирасида:
- мамлакатнинг барча маҳаллаларида нуронийлар, шу жумладан, «Саховат» ва «Мурувват» интернат уйларида истиқомат қилаётган кексалар иштирокида маданий-маърифий тадбирлар, танловлар, хайрия тадбирлари, жумладан, нуроний ва ёшлар ўртасида шахмат-шашка бўйича «Ақл чархи» турнири, волейбол, мини-футбол, стол тенниси ва бошқа спорт мусобақалари;
- жамоатчилик вакиллари иштирокида ҳудудлардаги янги қад ростлаган «Нуронийлар маскани», «Маҳалла маркази» мажмуалари, фуқаролар йиғини бинолари ҳамда маҳаллалардаги бошқа ижтимоий объектларнинг очилиш маросимлари;
- маҳаллаларда ҳунарманд-усталар, кулоллар томонидан яратилган миллий маҳсулотлар ҳамда турли миллат вакилларининг амалий санъат, ҳунармандчилик буюмлари, либослари кўргазмалари;
- нуронийлар иштирокида музей, зиёратгоҳ ва қадамжолар, шунингдек, Ўзбекистондаги диққатга сазовор жойларга саёҳатлар;
- зиёратгоҳ ва қабристонлар, якка, ёлғиз кексалар хонадонида ҳашар асосида ободонлаштириш ишлари;
- 100 ёш ва ундан катта ёшдаги нуроний отахон ва онахонлар иштирокида «Аср билан юзма-юз» мавзусидаги тадбирлар;
- таълим муассасаларида ибратли ҳаёт йўли ва меҳнати билан аҳоли ўртасида обрў-эътибор қозонган кексалар иштирокида «Нуронийлар — ёшлар нигоҳида» мавзусида учрашув ва кўрик-танловлар, расмлар кўргазмаси;
- маҳаллаларда «Бобом, бувим ва мен китобхон» шиори остида китобхонлик акциялари;
- оилаларда ижтимоий-маънавий муҳитни янада соғломлаштириш мақсадида кекса авлод вакиллари иштирокида «Кекса авлод оилавий ажримларга қарши», «Биз бор жойда жиноятга ўрин йўқ», «Ҳаётнинг қадрига ет» мавзуларида давра суҳбатлари ташкил этилади.
Турли соҳаларда фаолият юритиб, нафақага чиққан кекса авлод вакиллари иштирокида учрашувлар уюштирилади;
Малакали шифокорлардан ташкил топган «Тиббиёт автобуслари» орқали республиканинг барча ҳудудлари, жумладан, чекка ва олис ҳудудларда жойлашган маҳаллаларда яшовчи ижтимоий ҳимояга муҳтож нуронийлар чуқурлаштирилган тиббий кўрикдан ўтказилади ҳамда зарур дори-дармон воситалари билан таъминланади. Ногиронлиги бор кекса аёлларга реабилитация воситалари, яъни ногиронлик аравачаси, ҳасса ва қўлтиқтаёқ, эшитиш мосламалари тақдим этилади;
«100 ёш билан юзлашганлар» номли китоб-альбом, «Кексалик ва маънавий мерос», «Кексалари эъзозланган юрт» номли рисолалар тақдимоти ўтказилади.
Изоҳ (0)