Тошкент вилоятида Жанубий Кореянинг Hwashin Cyber университети филиали очилади

Тошкент вилоятида Жанубий Кореянинг Hwashin Cyber университети филиали очилади. Бу ҳақда вилоят ҳокимлиги матбуот хизмати хабар берди.

Қайд этилишича, бундай таклиф 20 сентябрь куни Тошкент вилояти ҳокимлигида вилоят ҳокими Даврон Ҳидоятов ва Hwashin Cyber университетининг МДҲ давлатлари бўйича бош мутахассиси Ким Сунгги ўртасида бўлиб ўтган учрашувда билдирилган.

Hwashin Cyber университети бунинг учун 10 миллион доллар инвестиция киритади. Суҳбат давомида мазкур лойиҳанинг имкониятлари ва икки тарафлама манфаатли жиҳатлари ҳақида тўхталиб ўтилди.

Университетда спорт зали, маданият саройи, кутубхона биноларини қуриш, таълим кластерини ташкил этиш, бунинг учун университет қошида мактабгача таълим ташкилоти, умумтаълим мактаб биноси, 600 ўринли талабалар турар жойларини барпо этиш, таълим жараёнини ташкил этишда мутахассислик фанларидан дарсларга малакали хорижий профессор-ўқитувчиларни жалб қилиш лозимлиги таъкидланди.

Шунингдек, университетда таҳсил олаётган талабаларга ўз йўналишларида ўқув машғулотларини Hwashin Cyber университетида давом эттириб, тегишли тартибда ушбу университет дипломини олиш имкониятини яратиб бериш тартибларини жорий этиш имкониятлари ҳам муҳокама қилинди.

Учрашув якунида ҳамкорлик юзасидан меморандум имзолашга келишиб олинди.

Маълумот учун, Hwashin Cyber университети «Жанубий Корея таълим органлари томонидан аккредитациядан ўтган биринчи кибер университет». Университет бизнес бошқаруви, психология, ижтимоий таъминот, чет тиллари, кино ва телеоператорлик иши, шунингдек, таэквондо бўйича олий маълумот беради.