Наманган халқаро аэропортида заҳарли моддалар сизиши билан боғлиқ фавқулодда вазиятларнинг олдини олишга қаратилган махсус-тактик ўқув машқи ўтказилди. Бу ҳақда «Дарё» мухбири Азизбек Абдувалиев хабар бермоқда.
Ўқув машқи мавзусига кўра, аэропорт ҳудудига кучли таъсир этувчи аммиак олиб келиниб, махсус контейнерга жойлаштириш вақтида контейнер носозлиги сабабли мазкур модда ташқарига сизиб чиқади ҳамда бир гуруҳ ишчи-ходимлар заҳарланади.
Бу ҳақда маълумот олингач, аэропорт фуқаро муҳофазаси тузилмалари Наманган вилоят Фавқулодда вазиятлар бошқармаси қутқарувчилари билан ҳамкорликда зудлик билан ишга киришди. Махсус техникалар жалб қилиниб, зарарланган ҳудуд тўлиқ қамраб олинди.
Аэропорт ёнғинга қарши кураш гуруҳининг транспортлари ёрдамида сувли тўсиқлар ҳосил қилинди. Контейнердан заҳарли модда сизиб чиқишига чек қўйиш учун махсус бандаж қўлланди ва хавф бартараф этилди. Ушбу ҳудуддан олиб чиқилган жабрланувчилар махсус зарарсизлантириш пунктидан ўтказилди.
Уларга дала шароитидаги тиббиёт пунктларида биринчи тиббий ёрдам кўрсатилди. Жабрланувчилар тез тиббий ёрдам транспортида шифохоналарга юборилди. Аэропорт ҳудудидаги бинонинг иккинчи қаватида қолиб кетган ишчи-ходимлар эвакуация қилинди ва хавфсиз жойга олиб чиқилди.
Якуний босқичда фавқулодда вазиятлар шароитида аэропорт ҳудудидаги панагоҳга ишчи-ходимларни жойлаштириш ва улар учун шарт-шароитлар яратиш бўйича тушунчалар берилди.
Наманган вилояти ФВБ матбуот хизмати раҳбари Қаҳрамон Саттаровнинг маълум қилишича, аэропортда ўтказилган махсус-тактик ўқув машқига 80 нафардан ортиқ иштирокчи ҳамда 18 та махсус техника жалб қилинди. Машқ давомида аниқланган камчиликлар мутасадди ва масъуллар томонидан батафсил таҳлил қилинди.
Изоҳ (0)