Ўзбекистонда инсон аъзолари ва тўқималарини трансплантация қилиш тўғрисидаги қонун қабул қилинади

Ўзбекистонда инсон аъзолари ва тўқималари трансплантацияси қонун билан мустаҳкамланади, деб хабар бермоқда Сенат матбуот хизмати.

Хабарда айтилишича, 20 сентябрь куни академик В.Воҳидов номидаги Республика ихтисослаштирилган хирургия илмий-амалий тиббиёт марказида «Инсон аъзолари ва тўқималари трансплантацияси тўғрисида»ги қонун лойиҳаси, унинг мазмун-моҳиятини масъуллар иштирокида муҳокама қилишга бағишланган давра суҳбати ўтказилди.

Йиғилишда таъкидланишича, илгари Ўзбекистонда буйрак ва жигар трансплантацияси амалиётлари ўтказилмаслиги оқибатида кўпчилик беморлар хорижий мамлакатларда катта маблағ эвазига даволанар эди. Ҳатто айримлари бевақт вафот этарди.

Сўнгги йилларда мазкур соҳада олиб борилган ислоҳотлар мамлакатда буйрак, жигар ва ўзак ҳужайрасини кўчириб ўтказиш амалиётини йўлга қўйишга имконият яратди. Натижада бугунги кунгача республикада 700 дан ортиқ ана шундай операция муваффақиятли бажарилди.

«Республикамизда 5 минг нафар бемор жигар циррозидан азоб чекса, уларнинг 500 нафари, яъни 10 фоизи жигар трансплантацияси амалиётига муҳтож. Бугунги кунга қадар мамлакатимизда жами 10 та жигар трансплантацияси амалга оширилди.

Истиқболда буйрак кўчириб ўтказиш амалиётини йилига 250 тага етказиш, жигар трансплантациясини эса йилига 50 тага етказиш режалаштирилган. Шунингдек, юрак трансплантациясини жорий этиш ва йилига 50 та амалиёт ҳамда ўпка трансплантациясини йўлга қўйиш ва йилига 30 та амалиётни бажариш назарда тутилган», — дейилади Сенат хабарида.

Тадбирда сўзга чиққан сенаторлар инсон аъзолари ва тўқималарини кўчириб ўтказиш амалиётини хорижда катта маблағ ва вақт сарфламасдан Ўзбекистонда ҳам амалга ошириш мумкинлигига урғу берган. Шунингдек, инсон аъзолари ва тўқималари трансплантацияси борасида қонунчиликда белгиланган нормалар бугунги кун талабларига мос эмаслиги, шу сабабли, мазкур қонун лойиҳасида аниқ тартиблар белгилаб берилаётганлиги таъкидланган.

Шунингдек, давра суҳбатида шундай жарроҳлик амалиётини бошидан ўтказган фуқаролар бу борада ўз фикр-мулоҳазаларини билдириб, ушбу қонун лойиҳаси ишлаб чиқилгани мамлакат аҳолиси саломатлигини муҳофаза қилиш ҳамда уларга қулайликлар яратилишида муҳим ҳужжат бўлишини билдирган.