«Тож», «Тед Лассо» ва «Қироличанинг юриши»: «Эмми-2021» лауреатлари эълон қилинди

19 сентябрь куни Лос-Анжелесда «Эмми» мукофотининг 73-тантанали тақдирлаш маросими бўлиб ўтди. Бу ҳақда мукофот сайтига таяниб, Esquire хабар берди.

2021 йилда «Энг яхши драматик сериал» номига «Тож» сазовор бўлди. У ва «Мандалориялик» сериали 24 та йўналиш бўйича мукофотга даъвогарлик қилаётганди. «Тож» актёрлари Жош ЎКоннор ва Оливия Колман энг яхши бош рол учун «Эмми»ни қўлга киритган бўлса, Тобаяс Мензис ва Жиллиан Андерсон «Иккинчи даражали энг яхши рол» бўйича мукофотга лойиқ кўрилди.

«Комедия жанридаги энг яхши сериал» — «Тед Лассо». Лойиҳанинг бош қаҳрамони Жейсон Судейкис комедия сериалдаги энг яхши эркак роли учун мукофотга эга бўлган. Унинг шериклари Бретт Голдстин ва Ханна Уэддингхем «Иккинчи даражали энг яхши актёрлар» йўналиши бўйича ғолиб бўлган. «Комедия жанридаги энг яхши аёл роли»ни «Айёрлик» сериалидаги Жин Смарт қўлга киритган.

«Қироличанинг юриши» энг яхши минисериал дея тан олинган. Минисериаллар орасида энг яхши эркак роли учун мукофотга Юен Макгрегор («Холстон») сазовор бўлди. Мазкур йўналишдаги энг яхши аёл роли мукофоти Кейт Уинслетга «Исттаунлик Мейр»даги иши учун насиб этган. Ушбу лойиҳада ўйнаган Эван Питерс ва Жулианна Николсон ҳайкалчаларни «Минисериалдаги энг яхши иккинчи даражали рол»лар учун қўлга киритган.

Эслатиб ўтамиз, 2020 йилда «Энг яхши драматик сериал» номинацияси бўйича ғолиблик «Ворислар» сериалига насиб этган, мазкур сериал қаҳрамони Жереми Стронг эса «Энг яхши актёр» номинацияси бўйича ғолиб деб топилганди.