Лондон Олий суди қарорига кўра, шаҳзода Филиппнинг васиятномаси 90 йилдан кейин эълон қилинадиган бўлди. Бундан мақсад шаҳзоданинг беваси, Буюк Британия қироличаси Елизавета II нинг «қадр-қиммати ва обрўсини» ҳимоя қилиш деб ёзади BBC суднинг оилавий ишлар бўлими раиси Эндрю Мафарлейннинг қарорига асосланиб.
Ёпиқ мажлис якунида Мафарлейн азалий анъанани бузмасликка қарор қилди ва қироллик оиласи аъзосининг васиятномасини очиқламасликка рухсат берди. Урф-одатларга кўра, оддий одамнинг васиятномасидан фарқли ўлароқ, жамоатчилик диққат марказида бўладиган қироллик аъзосининг васиятномаси ўнлаб йиллар давомида муҳрланган ҳолда сақланиши мумкин.
«Ҳукмдор (қиролича Елизавета II) ва унинг оиласига яқин кишиларнинг қадр-қимматини сақлаб қолиш учун, ушбу тоифадаги гуруҳ кишилари ҳаётининг чинакам шахсий томонлари ҳимоясини кучайтириш керак», — дея тушунтирди судья. Унинг сўзларига кўра, судья шаҳзода Филипп васиятномасининг мазмуни билан шахсан таниш эмас, фақат унинг бажарилиш вақтини билади — бу 90 йилдан кейин.
Нашр аниқлик киритишича, айни пайтда, Лондон Олий суди оилавий ишлар бўлими раисининг сейфида турли йилларда вафот этган қироллик оиласи аъзоларининг сўнгги истаклари ёзилган яна 30 та ёпиқ конверт сақланмоқда. Бу анъана фақат бир марта — 1997 йилда Уэльс маликаси Диананинг вафотидан кейин бузилган. Васиятномасида малика ўз мулкини ўғиллари шаҳзода Гарри ва Уильям 25 ёшга тўлгандан сўнг, уларга ўтишига ишонч билдирган.
9 апрель куни Буюк Британия қироличаси Елизавета II нинг турмуш ўртоғи шаҳзода Филипп 99 ёшида оламдан ўтганди. Филиппнинг дафн маросими 17 апрелда Виндзордаги сарой ҳудудида ўтказилган. Коронавирус сабаб жорий қилинган чекловлар туфайли маросимда 30 киши иштирок этган. Елизавета II Эдинбург герцоги билан бир оила сифатида 73 йил умр кечирди. Ушбу вақт давомида улар тўрт нафар фарзандни вояга етказди – валиаҳд шаҳзода Чарльз Уэльский, малика Анна, Йорк герцоги Эндрю ва Уэссекск графи Эдвард, шунингдек, қироличанинг саккиз нафар невара ва ўн нафар эвараси бор.
Изоҳ (0)