Тўсатдан организмнинг ширинлик, қовурилган ҳамда бошқа маҳсулотларни талаб қилиши айрим модда ва витаминларнинг етишмаслиги ёки бошқа сабаблар билан боғлиқ бўлиши мумкин.
Фото: Freepik
Шоколадга мойиллик нимадан дарак беради
Шоколадга бўлган мойиллик организмдаги магний танқислигидан далолат беради. Ушбу минерал энергия ишлаб чиқарилиши, глюкоза метаболизми ва мушаклар вазифаси учун жавоб беради. Бу, айниқса, доимий равишда спорт залга борадиганларга тегишли ҳисобланади. Бундан ташқари, магний даражаси аёлларга яхши таниш бўлган ҳолат сабаб ҳам камайиши мумкин.
Нима қилиш керак?
Таркибида шакар бисёр бўлмаган, камида 75 фоиз какаоли шоколад истеъмол қилинг. Ё бўлмаса, рационингизга оддий кунгабоқар пистасини киритинг.
Ширинликка мойиллик бўлса
Ширинликка бўлган талабнинг юқори бўлиши энергия етишмаётганидан ҳам далолат беради. Шакар, айниқса, узоқ зўриқиш ёки стрессдан кейин ҳужайралар учун муҳим «ёқилғи» ҳисобланади.
Нима қилиш керак?
Энергияга тўйиб олишнинг оддий усули ёғ билан бирга оқсил истеъмол қилиш саналади. Масалан, бир ҳовуч ёнғоқ билан олма ёки мевалар билан кефир сизга бу борада ёрдам беради. Оддий шакардан фарқли равишда ҳужайралар ушбу «ёқилғи»ни узоқ муддат сарфлайди.
Музқаймоқ ейишга мойиллик
Бу организмнинг фойдали ёғларга эҳтиёжи борлигини билдиради.
Нима қилиш керак?
Музқаймоқ ўрнига фойдали ёғларнинг кони бўлган бир ҳовуч ёнғоқ ёки авокадо истеъмол қилинг. Музқаймоқ олганда эса шакар кам қўшиладиган кокос таъми келадиганидан танланг.
Шўр маҳсулотларга мойиллик
Бу организмнинг сувсизланганидан дарак беради. Туз организмда сувни ушлаб туради, айнан шу сабаб ҳам суюқлик етишмаганда одамнинг шўр маҳсулот истеъмол қилгиси келади.
Нима қилиш керак?
Шунчаки оддий сув ичинг. Ўзини ича олмасангиз, ялпиз, лимон ва музлатилган мевалар қўшиб истеъмол қилинг.
Бургерга мойиллик бўлса
Мазали бургер ёки гўштдан тайёрланган стейк ейиш истагининг пайдо бўлиши темир моддаси, B12 витамини ҳамда фоли кислотаси танқислигини англатади.
Нима қилиш керак?
Ферма гўштидан тайёрланган бургерларни истеъмол қилаверишингиз мумкин. Антибиотиклар ва гормонларсиз боқилган ҳайвон гўшти унчалик зарарли бўлмайди. Рационга творог, арахис, ясмиқ ҳамда тунец сингари маҳсулотларни киритинг.
Крахмалли углеводларга мойиллик
Паста ёки пицца ейишга мойилликнинг пайдо бўлиши кайфиятни кўтарадиган серотонинга эҳтиёж борлигини билдиради.
Нима қилиш керак?
Атрофингизни шамлар билан ўраб, ёқимли ифорлар таралиб турадиган ванна қабул қилинг. Медитация билан шуғулланинг. Тинчланиб, ўзингизни яхши ҳис қила бошлайсиз. Бургердан тийилсангиз, семириб кетиш хавфи ҳам сизни безовта қилмай қўяди.
