Халқаро молия институти (IIF) ҳисоб-китобларига кўра, 2021 йилнинг иккинчи чорагида жаҳон қарзи рекорд даражага — 296 триллион долларга етган. Бу коронавирус пандемиясидан аввалги кўрсаткичдан 36 триллионга кўп.
«2021 йилнинг иккинчи чорагида жаҳон қарзи 4,8 триллион долларга ошди ва рекорд даражадаги 296 триллион долларга етди», — дейилади IIF сайтида.
Глобал қарз ҳукуматлар, банклар, корпорациялар ва уй хўжаликлари қарзини ўз ичига олади. IIF’нинг барқарорликни тадқиқ қилиш бўлими директори Эмре Тифтикнинг сўзларига кўра, иқтисодий тикланиш даражаси пандемиядан аввалги ҳолатга қайтиш учун ҳали етарли эмас. Унинг таъкидлашича, агар қарз олиш шундай маромда давом этса, глобал қарз 300 триллион доллардан ошади.
Шу билан бирга, иккинчи чоракда жаҳон қарзининг ЯИМга нисбати 2021 йилнинг биринчи уч ойи кўрсаткичларига нисбатан яхшиланди, дейилади ҳисоботда.
Ёз ўрталарида жаҳон қарзи ЯИМнинг 353 фоизини ташкил этганди — бу биринчи чоракка қараганда 9 фоизга кам. IIF ҳисоботига кўра, бу кўрсаткич ҳозирча фақат Аргентина, Дания, Ирландия, Ливан ва Мексикада пандемиядан олдинги даражани сақлаб турибди.
Маълумот учун, Ўзбекистон давлат қарзи 2021 йилнинг 1 июль ҳолатига 858,6 миллион долларга ёки 3,7 фоизга ошиб, 24,2 миллиард долларни ташкил қилмоқда. Қайд этилишича, давлат қарзи ялпи ички маҳсулотга (ЯИМ) нисбатан 38,5 фоизни ташкил этмоқда.
Бунда давлат ташқи қарзи қолдиғи – 21,8 миллиард долларни ёки ЯИМга нисбатан 34,7 фоизни, давлат ички қарзи қолдиғи – 2,4 миллиард долларни ёки ЯИМга нисбатан 3,8 фоизни ташкил этмоқда.
Изоҳ (0)