Шимолий Корея Япон денгизи томонга иккита баллистик ракета учирди. Бу ҳақда Жанубий Кореянинг Yonhap агентлиги Штаб бошлиқлари бирлашган қўмитасига (JCS) таяниб хабар берди.
Нашрнинг ёзишича, Шимолий Кореянинг марказий ҳудудларидан «номаълум турдаги ракеталар» учирилган. Жанубий Корея ва АҚШ хизматлари тафсилотларни таҳлил қилмоқда, дейди JCS баёнотида.
«Бизнинг кучларимиз АҚШ билан яқиндан ҳамкорлик қилган ҳолда тўлиқ шай турибди», — дея қайд этди ҳарбийлар.
Шу билан бирга, Пхеняннинг муваффақиятли ракета учиргани ҳақидаги маълумотларни эълон қиладиган Корея марказий телеграф агентлиги бу сафар ҳеч қандай хабар бермаган. Япониянинг NHK телеканалига кўра, Токио Шимолий Корея баллистик ракетани учирган деб ҳисобламоқда. Ҳукумат ҳозирча ракетанинг учирилиши ҳақида маълумот йиғмоқда, дея қўшимча қилди канал.
Япония Мудофаа вазирлигининг хабар беришича, учирилган ракеталар Япония ҳаво ҳудудига кирмаган ва мамлакат иқтисодий зонасидан ташқарига қулаган, деб хабар беради Kyodo агентлиги.
Шунга қарамай, Япония бош вазири Ёсихидэ Суга ракета учирилгандан кейинги баёнотида КХДР фаолиятини Япония ва бутун минтақага таҳдид деб атади.
Икки кун олдин КХДР янги узоқ масофага мўлжалланган қанотли ракетани муваффақиятли тарзда синовдан ўтказгани ҳақида эълон қилганди.
Ракета 1,5 минг километр масофада жойлашган нишонга тегди, дейилади хабарда. Янги қанотли ракетани ишлаб чиқиш сўнгги икки йилдан буён давом этаётганди. Бу вақт ичида қуролнинг алоҳида қисмлари синовлардан муваффақиятли ўтган.
Шимолий Кореянинг қанотли ракетанинг муваффақиятли синови ҳақидаги даъволари Япониянинг хавотирига сабаб бўлди.
«Бу (ракета учирилиши) мамлакат хавфсизлигига таҳдид солади ва Япония учун ташвиш уйғотади», — деди Япония ҳукумати бош котиби Кацунобу Като.
Унинг сўзларига кўра, Япония ҳукумати КХДРнинг ҳарбий соҳадаги барча ҳаракатларини диққат билан кузатиб бормоқда, бироқ учирилган ракета Япониянинг эксклюзив иқтисодий зонасига ўтгани ҳали тасдиқланмаган. «Айни пайтда биз батафсил таҳлил олиб бормоқдамиз», — дея қўшимча қилди у.
Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилганди. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб тегган.
Бундан ташқари, КХДР март ойида Япон денгизига қарата иккита баллистик ракета учирганди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.
Кейинроқ Шимолий Корея томонидан баллистик ракеталарнинг учирилиши АҚШ ва Япониянинг доимий таҳдидлари олдида ўзини ҳимоя қилиш бўлгани ҳақида айтилди.
Изоҳ (0)