«Миллий тикланиш» демократик партияси Марказий кенгаши раиси ўринбосари Феруза Муҳаммаджонова TikTok ижтимоий тармоғини бутунлай блоклашни таклиф қилди.
Маълум қилинишича, 9 сентябрь куни Навоий шаҳридаги икки ўқувчи қиз TikTok ижтимоий тармоғида ножўя сўзларни намойиш қилиб, уни тўғридан-тўғри эфирга чиқарган. Ҳуқуқ тартибот органлари берган хабарга кўра, мазкур ҳолат Навоий шаҳридаги 10-мактабда 16 ёшли ўқувчилар иштирокида ҳуқуқшунослик дарси пайтида содир бўлган.
Ижтимоий тармоқлардаги баъзи хабарларда бу ҳолат 8 сентябрда содир бўлгани ва шу куннинг ўзида юзага келган вазият мактаб ўқувчиларининг ота-онаси билан бирга муҳокама қилингани ва ҳолат бўйича ҳуқуқбузарларнинг узр сўрагани айтилган. Ўқувчилар эса бу ҳаракати билан шунчаки ҳазиллашмоқчи бўлишганини қайд этган.
«Миллий тикланиш» демократик партиясининг маълум қилишича, мазкур масала жамоатчиликнинг ҳақли эътирозига сабаб бўлган ушбу вазиятни умумтаълим мактабларида маънавий муҳитнинг носоғломлигидан, тарбия жараёнининг етарли даражада ташкил этилмаётганидан далолат берувчи аянчли ҳолат деб баҳолайди.
«Афсуски, ҳозирда одоб-ахлоққа зид ҳаракатлар медиа маконида урчиб ётибди. Кўп ҳолда видеороликларнинг асосий қаҳрамонлари мактаб ўқувчилари эканлиги масалага ечим берадиган ва унинг ижросини таъминлайдиган соҳа вакилларини чуқурроқ ўйлантириши керак.
‘Миллий тикланиш’ демократик партияси ушбу ҳолат бўйича қуйидаги таклифларни илгари суради:
Биринчидан, кечирим сўраш урф, лекин у Ўзбекистон қонунчилигида жазо чораси сифатида ҳуқуқий оқибатни туғдирмайди. Шундан келиб чиққан ҳолда, вояга етмаганлар томонидан қилинадиган бундай хатти-ҳаракатларга нисбатан жавобгарликни кучайтириш керак.
Иккинчидан, кечирим сўраш бугун жамиятимизда тобора одатга айланиб қолди. Тўғри, кечирим сўраш одати бизнинг жамиятимизда қадрият даражасида эъзозланади, бироқ айни кунда уни суиистеъмол қилиш кундалик ҳаётимизда кучайиб бормоқда. Шу ўринда ҳар бир фуқаро қонун олдида бир ва тенг жавобгар эканлигини унутмаслиги лозим. Зеро Ўзбекистон Республикаси Конституциясининг 18-моддасида: ‘Ўзбекистон Республикасида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқейидан қатъи назар, қонун олдида тенгдирлар’, деб қайд этилган.
Учинчидан, партия аксарият ҳолда ҳуқуқбузарликларни намойиш этиш ҳисобига ўз ўқувчиларини кўпайтираётган TikTok ижтимоий тармоғини болалар учун хавф майдони деб ҳисоблайди ва шу боис ушбу тармоқ фаолиятини бутунлай чеклаш тарафдори.
Зеро ОАВ соҳасидаги тадқиқотлар ва кундалик ҳаёт бугун, энг аввало, мактаб ўқувчилари унга ипсиз боғланганларини кўрсатмоқда. Ёшларни маънавий оламига салбий таъсир ўтказаётган видеоконтентлар зарарини бугун холис баҳолаш фурсати етди. Биз тарбияни очиқ ахборотлар эвазига бой бермаслигимиз керак. TikTok’ка ўхшаган ахборот манбалари ҳисобига тўғри келаётган инфоэпидемиянинг олдини олиш учун қонуний чоралар кучайтирилиши керак.
Тўртинчидан, партия тарбия фанини ўқитиш борасида парламент назоратини доимий равишда кучайтириб боради ва олий таълим муассасаларида тарбиячи мутахассислиги бўйича кадрлар тайёрлайдиган факультетларни жорий қилиш ишларини жадаллаштириш лозим деб ҳисоблайди (Афсус, мана икки йилдирки ушбу масала юзасидан ҳукумат қарорининг ижроси пайсалга солинмоқда).
Навоийда сўконғич қизлар билан бўлиб ўтган ҳодиса нафақат таълим, маҳалла, ҳуқуқ тартибот идоралари мутасаддилари, балки ёшлар тарбиясига бевосита масъул ташкилотларга ва кенг жамоатчилигимизга огоҳлик қўнғироғи бўлиши даркор.
Биз фарзандлар камолотига тўсқинлик қиладиган ҳар қандай хавфларни ўзимиз аниқлаб, уни ҳамкорликда бартараф этиб, мактабни чин маънода таълим-тарбия ўчоғига айлантиришимиз мумкин. Бу борада жадидимиз Фитратнинг ‘Оиладаги яхши тарбия мактаб учун катта мадад’ эканлиги ҳақидаги фикрларини ҳисобга олиб ҳаракат қилишимиздан бошқа чора йўқ!», – деб ёзади Феруза Муҳаммаджонова.
Изоҳ (0)