AQShda sodir etilgan teraktlarining 20 yilligiga bag‘ishlab 11-sentabr kuni e’lon qilingan videorolikda “Al-Qoida” terrorchilik tashkiloti yetakchisi Ayman az-Zavohiriy ko‘rinish berdi. Bu haqda terrorchilarning Internetdagi faolligini kuzatib boruvchi SITE tashkiloti rahbari Rita Kats ma’lum qilgan.
SITE xabar berishicha, “Al-Qoida” rahbarining videosi qachon yozib olingani noma’lum. 60 daqiqalik murojaatida Ayman az-Zavohiriy “Quddus hech qachon yahudiylarniki bo‘lmaydi”, — deb aytgan va “Al-Qoida” terrorchilarining teraktlarini, jumladan, 2021-yil yanvar oyida Suriyaning Rakka shahrida Rossiya qo‘shinlariga uyushtirilgan hujumni maqtagan, deb yozadi Associated Press.
Shuningdek, u Afg‘onistondan Amerika qo‘shinlarining olib ketilishini tilga olgan, bu haqda “Tolibon” va AQSh 2020-yilning fevral oyida kelishib olgan edi. Ammo az-Zavohiriy 2021-yilning avgust oyida “Tolibon” Afg‘onistonni egallab, Kobulni o‘z nazoratiga olgani to‘g‘risida hech narsa demagan. Bu shuni anglatadiki, video e’lon qilinganidan ancha oldinroq yozilgan.
12-sentabr kuni AQSh razvedkasi sobiq rahbari Maykl Morell CBS telekanaliga bergan intervyusida az-Zavohiriy Afg‘onistonda yashiringani taxmin qilinayotganini aytdi. “Bizning fikrimizcha, ‘Tolibon’ bugun az-Zavohiriyga boshpana berib, uni yashiryaptimi, demak u ‘Al-Qoida’ni himoya qilyapti”,— dedi Morell.
2020-yil may oyidayoq BMT “Al-Qoida”ning “yuzlab qurollangan jangarilari”, shuningdek az-Zavohiriy ham Afg‘onistonda ekanini ma’lum qilgandi.
Tashkilotning ta’kidlashicha, “Tolibon” va “Al-Qoida” o‘rtasidagi aloqalar eski munosabatlar, birgalikdagi kurashlar va o‘xshash mafkuralarga asoslangan holda yaqinligicha qolmoqda. “Tolibon”, shuningdek, “Al-Qoida”ga “tarixiy aloqalar” inobatga olinishini kafolatlagan.
Associated Press agentligining ta’kidlashicha, 2020-yil oxirida “Al-Qoida” rahbarining o‘limi haqida tasdiqlanmagan xabarlar paydo bo‘lgandi. 11-sentabr kuni chiqarilgan video az-Zavohiriyning o‘limi haqidagi mish-mishlardan keyingi birinchi tasvir.
Ayman az-Zavohiriy 2011-yilda Usama bin Laden o‘ldirilganidan keyin “Al-Qoida”ning yetakchisiga aylangan edi.
Mavzuga doir:
Izoh (0)