Украина президенти Владимир Зеленскийнинг айтишича, Россия билан уруш эҳтимоли бор, лекин шундай бўлган тақдирда, бу Москванинг «энг катта хатоси» бўлади. Бу ҳақда сиёсатчи YES Brainstorming форумида гапириб ўтди.
«Менимча, мумкин… Бундай бўлиши мумкинлиги ниҳоятда ёмон, лекин, афсуски, бундай эҳтимол бор», — деб жавоб берди Зеленский Россия билан кенг кўламли уруш эҳтимоли бор-йўқлиги ҳақидаги саволга.
Зеленскийнинг сўзларига кўра, 2014 йилда Москва бу йўналишда «олдинга қадам» ташлаган, бироқ украиналиклар вазиятнинг нохуш ривожланишини тўхтатишга муваффақ бўлган. Президентнинг қўшимча қилишича, агар Россия томонидан «кучли эскалация» юз берса, «Россия, Украина, Беларусь ўртасида ҳеч қачон қўшничилик бўлмайди».
Апрель ойида Украина президенти матбуот котиби Юлия Мендел Киев Донбассга ҳужум уюштирмоқчи эмаслигини айтганди. «Украина ўз ҳудудига ҳужум қила олмайди, ўз халқи билан жанг қила олмайди», — деган эди у. Кейинроқ Украина президенти девони раҳбарининг маслаҳатчиси Алексей Арестович, Россиянинг ҳужумига жавобан, Киевнинг «бошқа чораси қолмаганда», Украина минтақада ҳужумга ўтишини айтган.
Россия ташқи ишлар вазири Сергей Лавровнинг фикрича, Донбассда Украина билан урушдан қочиш керак. «Агар бу бизга ва минтақадаги посбонларга боғлиқ бўлса, уларнинг принципиал ёндашувларини тушунишимиз мумкин бўлса, урушдан қочиш мумкин ва шундай қилиш керак ҳам», — деди у.
Ташқи ишлар вазирининг таъкидлашича, у Украина томонининг хатти-ҳаракатларига кафолат бера олмайди, чунки Зеленский учун асосий нарса — ҳар қандай ҳолатда ҳам ҳокимиятда қолиш.
«У ҳар қандай нархни тўлашга тайёр, шу жумладан, Донбасс жангариларини террорчи деб эълон қилишда давом этаётган неонацистлар ва ўта радикалларга ён беришга ҳам», — дея қўшимча қилди Лавров.
Аввалроқ Украина президенти киберқўшин тузишни буюргани ҳақида хабар берилганди. Бундан ташқари, президент ҳукуматга киберқўшинларни яратиш ва уларнинг тўғри ишлашини таъминлаш учун зарур бўлган моддий, техник ва молиявий ресурслар миқдорини ҳисоблаб чиқишни буюрди.
Изоҳ (0)