Ташқи ишлар вазири Абдулазиз Комилов 10 сентябрь куни Латвиянинг Ўзбекистондаги элчиси этиб тайинланган Рейнис Трокшни қабул қилди, деб хабар бермоқда вазилик матбуот хизмати.
Қайд этилишича, ишонч ёрлиқлари нусхаларини қабул қилиб олган Абдулазиз Комилов элчини масъулиятли лавозимга тайинлангани билан табриклади ҳамда унинг кўп қиррали Ўзбекистон—Латвия ҳамкорлигини янада ривожлантириш ва мустаҳкамлаш йўлида ишлашига умид билдирди.
Суҳбат чоғида аввал эришилган келишувларни амалга ошириш масалалари ва турли даражадаги бўлажак расмий учрашувлар жадвали муҳокама қилинди. Томонларнинг сиёсий-дипломатик, савдо-иқтисодий ва маданий-гуманитар алоқаларни фаоллаштиришдан бирдай манфаатдорлиги маълум қилинди.
Ўзбекистон ва Латвиянинг халқаро ташкилотлар доирасидаги ҳамкорлиги ва айрим минтақавий масалалар юзасидан ҳам фикр алмашилди.
Бундан аввал Ўзбекистонда Швейцария ва Германия янги элчилари иш бошлагани, Баҳром Ашрафхонов Ўзбекистоннинг Грузиядаги элчиси этиб тайинлангани ҳақида хабар берилган эди.
Изоҳ (0)