Президент Шавкат Мирзиёев 10 сентябрь, жума куни Токиодаги ёзги Паралимпия ўйинлари иштирокчилари билан ўтказилган учрашувда Ўзбекистон Миллий паралимпия қўмитаси таркибида «Матонат мактаби»ни ташкил этишни таклиф қилди. Бу ҳақда «Дарё» мухбири хабар бермоқда.
«Паралимпия спорт турлари бўйича тренерларни тайёрлаш ҳамда уларни ижтимоий қўллаб-қувватлашга ҳам алоҳида эътибор қаратиш лозим. Бу борада ёшлар ўртасида спорт тадбирларини ташкил этиш ва ўтказишга масъул бўлган махсус инструктор ва ташкилотчиларни тайёрлаш тизимини йўлга қўйиш талаб этилади. Абдуҳакимов жорий йил якунига қадар паралимпия спорт турлари бўйича ном қозонган спортчиларимизни мураббий сифатида ишга қабул қилиш тизимини жорий этсин», — деди давлат раҳбари.
Президент 2022/2023-ўқув йилидан бошлаб, Ўзбекистон Миллий паралимпия қўмитаси қошида Паралимпия спорт турлари бўйича мутахассисларни тайёрлаш институти фаолиятини ташкил этиш чораларини кўриш бўйича ҳам масъулларга топшириқ берди.
«Пара-спортчиларни мунтазам равишда тиббий кўрикдан ўтказиш, жисмоний ва руҳий тайёргарлигини ошириш мақсадида, уларни Республика спорт тиббиёти илмий-амалий марказига бириктирилади. Шунингдек, улар махсус дори-дармон ҳамда халқ табобати воситалари билан таъминланади.
Республикада қишки спорт турларини ҳам ривожлантириш мақсадида, Абдуҳакимов, М.Тошхўжаев ҳокимликлар билан биргаликда паралимпия қишки спорт турлари бўйича келгуси йилларда халқаро мусобақаларда спортчиларимизнинг иштирокини таъминласин.
Бунинг учун «Амирсой» тоғ-чанғи спорт мажмуаси ҳамда Humo Arena муз саройи базаларида паралимпиячилар учун шароит яратиш зарур», — деди Шавкат Мирзиёев.
Изоҳ (0)