Tashqi ishlar vaziri Abdulaziz Komilov 10-sentabr kuni Latviyaning O‘zbekistondagi elchisi etib tayinlangan Reynis Trokshni qabul qildi, deb xabar bermoqda vazilik matbuot xizmati.
Qayd etilishicha, ishonch yorliqlari nusxalarini qabul qilib olgan Abdulaziz Komilov elchini mas’uliyatli lavozimga tayinlangani bilan tabrikladi hamda uning ko‘p qirrali O‘zbekiston—Latviya hamkorligini yanada rivojlantirish va mustahkamlash yo‘lida ishlashiga umid bildirdi.
Suhbat chog‘ida avval erishilgan kelishuvlarni amalga oshirish masalalari va turli darajadagi bo‘lajak rasmiy uchrashuvlar jadvali muhokama qilindi. Tomonlarning siyosiy-diplomatik, savdo-iqtisodiy va madaniy-gumanitar aloqalarni faollashtirishdan birday manfaatdorligi ma’lum qilindi.
O‘zbekiston va Latviyaning xalqaro tashkilotlar doirasidagi hamkorligi va ayrim mintaqaviy masalalar yuzasidan ham fikr almashildi.
Bundan avval O‘zbekistonda Shveysariya va Germaniya yangi elchilari ish boshlagani, Bahrom Ashrafxonov O‘zbekistonning Gruziyadagi elchisi etib tayinlangani haqida xabar berilgan edi.
Izoh (0)