Ливан президенти Мишел Аун ва бош вазир этиб тайинланган Нажиб Микати республиканинг 24 вазирдан иборат янги ҳукумати таркибини келишиб олди. Бу ҳақда президент саройи Баабдадаги манбасига таяниб, «ТАСС» хабар берди.
«Давлат раҳбари бугун (10 сентябрь) Вазирлар Маҳкамасининг таркибини тасдиқлаши ва фармонга имзо чекиши мумкин. Бош вазир Микатининг яқин соатларда Баабда саройига келиши кутилмоқда», — деди «ТАСС» манбаси.
Манбага кўра, асосий вазирларнинг исмлари ўтган ҳафтада маълум бўлган: Абдулла Бу Хабиб (насроний-маронит) республика ташқи ишлар вазири лавозимини эгаллайди, Морис Слим (православ) мудофаа бўлимини бошқаради, Юсуф Халил (шиа мусулмон) молия вазири этиб тайинланади, шунингдек, суннийлар жамоасидан истеъфодаги генерал Марван Зейн Ички ишлар вазирлигининг раҳбари бўлади.
«Вазирлар Маҳкамасини тузишнинг кечикишига иқтисодиёт вазири лавозимига номзод танлаш чўзилиб кетгани сабаб бўлди, ушбу лавозим эгаси ислоҳотлар ва реконструкция жараёнида асосий рол ўйнайди. Ҳозир танлов Амина Салямда тўхтаган, у вазирликни бошқариши мумкин», — деди манба. Унинг сўзларига кўра, Ливан давлат университетининг журналистика факультети собиқ декани Жорж Каллас ахборот вазири бўлади.
Ливандаги вазият
Байрут денгиз портида содир бўлган фожиали портлаш фонида Ҳасан Диаб бошчилигидаги технократлар кабинети истеъфога чиққандан сўнг, Ливан 2020 йилнинг 10 августидан бери ҳукуматсиз қолмоқда. Собиқ бош вазир, суннийлардан бўлган сиёсатчи Саад Ҳаририй ўн ой давомида президент билан вазирлик лавозимларини мусулмонлар ва насронийлар ўртасида тақсимлаш тўғрисида келиша олмади, натижада у 15 июлда истеъфога чиқди.
26 июль куни президент Аун Ливан шимолидаги Триполи шаҳри депутати Нажиб Микатини бош вазир этиб тайинлади ва унга янги ҳукумат тузишни топширди. Давлат раҳбарининг Баабда саройида бўлиб ўтган парламент фракциялари билан маслаҳатлашувларидан сўнг, Микатининг номзоди қонун чиқарувчи ҳокимиятнинг 115 аъзосидан 72 нафари томонидан қўллаб-қувватланди.
65 ёшли сиёсатчи ва тадбиркор Нажиб Микати Ливан ҳукуматини икки марта бошқарган: биринчи сафар 2005 йилда собиқ бош вазир Рафик Ҳаририй ўлдирилганидан кейин, иккинчи сафар 2011—2014- йилларда қўшни Суриядаги инқироз пайтида юзага келган кескин сиёсий қарама-қаршиликлар даврида.
Изоҳ (0)