Бош прокуратура ҳузуридаги департамент пандемия шароитида талаб юқори бўлган воситаларни дорихонадан ташқарида сотиш ҳолатлари аниқлангани ҳақида хабар бермоқда.
Бўстонлиқ туман бўлими ҳамда ДБҚнинг вилоят бошқармаси томонидан М.К. ва бошқалар 460 қути «SARS-COV-2 лгМ/лгC» тиббий буюмларини 30 минг АҚШ долларига сотган вақтида ушланган.
Шунингдек, департаментнинг Чиноз туман бўлими, ДХХ ҳамда ДБҚнинг вилоят бошқармалари томонидан Ж.Ш. ва бошқалар 175 қути «Ремдесивир» дори воситасини 7875 АҚШ долларига сотган шахслар қўлга олинган.
Худди шундай ҳолат департаментнинг Тошкент туман бўлими ҳамда ДБҚнинг вилоят бошқармаси томонидан А. 8 300 дона «Никозон-С» дори воситасини 120 миллион сўмга сотган вақтида ушлангани маълум қилинган.
Мазкур ҳолатлар юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят ишлари қўзғатилган. Ушбу моддага асосан, айбланувчига 3 йилгача ахлоқ тузатиш ишлари ёки 2 йилдан 5 йилгача озодликни чеклаш жазоси тайинланиши мумкин.
Аввалроқ «Ремдесивир» дори воситасини ноқонуний сотишга уринган шахслар Зангиота, Жиззах, Тошкентнинг Юнусобод ва Яккасарой туманларида ушланган. Бундан ташқари, пандемия шароитида талаб юқори бўлган «Фавилок», «Фавиправир», «Клексан» дориларини ноқонуний сотиш ҳолатлари аниқланган. Шунингдек, дориларнинг ноқонуний савдоси Тошкент ва Қашқадарёда, кейинроқ Тошкент ва Сирдарёда бартараф этилган.
Изоҳ (0)