Bosh prokuratura huzuridagi departament pandemiya sharoitida talab yuqori bo‘lgan vositalarni dorixonadan tashqarida sotish holatlari aniqlangani haqida xabar bermoqda.
Bo‘stonliq tuman bo‘limi hamda DBQning viloyat boshqarmasi tomonidan M.K. va boshqalar 460 quti “SARS-COV-2 lgM/lgC” tibbiy buyumlarini 30 ming AQSh dollariga sotgan vaqtida ushlangan.
Shuningdek, departamentning Chinoz tuman bo‘limi, DXX hamda DBQning viloyat boshqarmalari tomonidan J.Sh. va boshqalar 175 quti “Remdesivir” dori vositasini 7875 AQSh dollariga sotgan shaxslar qo‘lga olingan.
Xuddi shunday holat departamentning Toshkent tuman bo‘limi hamda DBQning viloyat boshqarmasi tomonidan A. 8 300 dona “Nikozon-S” dori vositasini 120 million so‘mga sotgan vaqtida ushlangani ma’lum qilingan.
Mazkur holatlar yuzasidan Jinoyat kodeksining 186-3-moddasi (dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishlari qo‘zg‘atilgan. Ushbu moddaga asosan, ayblanuvchiga 3 yilgacha axloq tuzatish ishlari yoki 2 yildan 5 yilgacha ozodlikni cheklash jazosi tayinlanishi mumkin.
Avvalroq “Remdesivir” dori vositasini noqonuniy sotishga uringan shaxslar Zangiota, Jizzax, Toshkentning Yunusobod va Yakkasaroy tumanlarida ushlangan. Bundan tashqari, pandemiya sharoitida talab yuqori bo‘lgan “Favilok”, “Favipravir”, “Kleksan” dorilarini noqonuniy sotish holatlari aniqlangan. Shuningdek, dorilarning noqonuniy savdosi Toshkent va Qashqadaryoda, keyinroq Toshkent va Sirdaryoda bartaraf etilgan.
Izoh (0)