Андижон вилоятида талабаликка тавсия қилинган 10 минг 84 нафар абитуриентнинг 7 минг 532 нафари умумтаълим мактаблари битирувчилари экани маълум қилинди. Бу ҳақда «Дарё» мухбири Умиджон Мамарасулов хабар бермоқда.
Вилоят халқ таълими бошқармаси матбуот хизматининг аниқлаштиришича, 2020/2021-ўқув йилида вилоятдаги 764 та умумтаълим мактабини 36 минг 488 нафар битирувчи тамомлаган бўлиб, уларнинг 262 нафари муддатидан аввал талабаликка қабул қилинган. Битирувчиларнинг 28 минг 39 нафари олий таълим муассасаларига кириш учун ҳужжат топшириб, тест синовларида иштирок этган.«Давлат тест маркази томонидан эълон қилинган натижаларни таҳлил қилиб чиққанимизда битирувчиларимизнинг 7 минг 532 нафари талаба бўлиш бахтига муяссар бўлган. Ўтган йилда ушбу кўрсаткич 5 минг 411 нафарни ташкил этган. Бу қувонарли, албатта. Яна бир жиҳатга эътибор қаратадиган бўлсак, талабаликка тавсия қилинган 10 минг 84 нафар абитуриентнинг 75 фоиздан ортиғини мактаб битирувчилари ташкил этмоқда. Қайд этиш лозим, айни пайтдаги кўрсаткичларимиз якуний хулоса эмас. Боиси, касбий-ижодий имтиҳони бор йўналишларга ҳам мингдан ортиқ битирувчимиз ҳужжат топшириб, имтиҳонларда иштирок этишган. Уларнинг натижалари эълон қилингандан сўнг рақамларда яна ўсиш кузатилиши мумкин», — дейди халқ таълими бошқармаси бошлиғи Азизбек Миркомилов.
Қўшимча қилинишича, вилоятда 4 та умумтаълим муассасаси битирувчилари ОТМларга киришда 100 фоизлик, яна 6 таси эса 90 фоиздан юқори натижани қайд этган.
Марҳамат туманидаги 3-давлат ихтисослаштирилган мактаб интернати директори Маҳфуза Ўринованинг айтишича, бу йил интернатни тамомлаган 46 нафар битирувчининг барчаси тест синовларидан муваффақиятли ўтган. Уларнинг 13 нафари давлат гранти, қолган 33 нафари эса тўлов-шартномаси асосида олий таълим муассасаларига ўқишга кирган.Таъкидланишича, ушбу муассаса битирувчилари ўтган йили ҳам 100 фоизлик натижани қайд этган. Ўшанда интернатнинг 25 нафари битирувчиси талаба бўлган эди.
«Бундан ташқари, Андижон ва Хўжаобод туманларидаги 38- ва 40-давлат ихтисослаштирилган мактаб интернатлари, Пахтаобод туманидаги 37-ихтисослаштирилган давлат умумтаълим мактаби битирувчиларининг барчаси, яъни 22 нафари давлат гранти, 53 нафари эса тўлов-шартнома асосида ОТМга қабул қилиниб, 100 фоизлик натижага эришилган. Андижон шаҳридаги Муҳаммад Юсуф ижод мактаби, Шаҳрихон туманидаги 4-ДИМИ, Хўжаобод туманидаги 23-ИДУМ, Балиқчи туманидаги 38-ДИМИ, Пахтаобод туманидаги 21-ДИМИ, Бўстон туманидаги 26-ДИМИ, Андижон шаҳридаги 13-умумтаълим мактаб, Жалақудуқ туманидаги 3-умумтаълим мактаб жамоалари ҳам 90 фоиздан юқори натижани қайд этган”, — дейди Азизбек Миркомилов.
Изоҳ (0)