Дунё ва ўзбек спортига оид 8 сентябрь кунининг энг муҳим хабарлари дайжести билан танишинг.
Ўзбекистон
Россиянинг Қозон шаҳрида МДҲ ўйинлари бўлиб ўтмоқда. 8 сентябрь кунги мусобақаларда Ўзбекистон Бел олиш ва Уч кураш ассоциацияси номидан 10 нафар спортчи Татаристоннинг миллий спорт тури — кореш бўйича баҳсларда иштирок этди.
Беллашувларда қатнашган 10 нафар терма жамоа аъзоларидан 4 нафари кумуш ва 5 нафари бронза медалини қўлга киритди ҳамда умумжамоа ҳисобида 3-ўринни эгаллади.
Жаҳон
FIFA 2022 йилги Жаҳон Чемпионати саралашидан ўрин олган Бразилия — Аргентина ўйини карантин қоидалари сабабли тўхтатилгани юзасидан интизомий иш очилганини эълон қилди.Эслатиб ўтамиз, Бразилия полицияси 5 сентябрь кунги ўйинда Аргентина сафида ҳаракат қилаётган 4 футболчи — Эмилиано Мартинес, Эмилиано Буэндиа (иккиси «Астон Вилла»), Жованни ло Челсо ва Кристиан Ромерони (иккиси «Тоттенҳэм») майдондан олиб чиқиб кетмоқчи бўлганди. Учрашув ҳаками ўйинни тўхтатиб туришга қарор қилди ва жамоалар майдонга қайтиб тушмади.
Бразилия соғлиқни назорат қилиш ташкилоти (Anvisa) қарорига кўра, мамлакатда Буюк Британиядан келган фуқаролар учун 14 кунлик карантин жорий қилинган. Анвисаънинг қайд этишича, юқорида исмлари келтирилган футболчилар ҳукуматни Буюк Британияга яқин орада бормагани ҳақидаги сохта ҳужжат билан алдашга уринган.
Оксфорд университети математиги Том Кроуфорд футболчиларнинг салоҳиятини солиштириш формуласини ишлаб чиқди, деб ёзади Daily Mail.
Олим футболчиларнинг клуб ва терма жамоалардаги ютуқларини ҳисобга оладиган 7 та критериядан иборат бўлган ўзига хос алгоритмдан фойдаланиб, турли давр футболчиларининг кўрсаткичларини таққослади.
Унга кўра, биринчи ўринни «Манчестер Юнайтед» ҳужумчиси Криштиану Роналду эгаллади. У бу йўлда «ПСЖ» ҳужумчиси Лионель Месси, Пеле, Ференс Пушкас, Альфредо ди Стефано, Диэго Марадона ва бошқаларни ортда қолдирди.
«Реал» Эдуардо Камавингани расман ўз ўйинчиси сифатида таништирди.
«Ренн»дан харид қилинган 18 ёшли ярим ҳимоячи «қироллик клуби»да 25-рақам остида ҳаракат қилади. Томонлар ўртасидаги шартнома 2027 йилгача амал қилади.
«Атлетико М» ҳам жамоага қайтган Антуан Гризманни таништирди.
Таништирув «Ванда Metropolitanо»да («Атлетико»нинг уй стадиони) бўлиб ўтди, унда клуб президенти Энрике Сересо франциялик ҳужумчига 8-рақамли футболкани тақдим этди.
«Челси» ҳужумчиси Тимо Вернернинг клубдаги бир йиллик маоши 20 миллион еврони ташкил қилади, деб ёзмоқда Sport Bild журналисти Кристиана Фалка.
Германиялик футболчи 2020 йилдан бери «аристократлар» сафида тўп суриб келади. Бу вақт ичида у АПЛда 37 ўйин ўтказиб, 6 та гол ва 8 та голли узатмани амалга оширди.
Изоҳ (0)