Жануби-ғарбий махсус ҳарбий округи қўмондони ўринбосарининг тегишли буйруғига асосан Сурхондарёнинг «Термиз» полигонида кенг кўламли ўқув-услубий йиғин бошланди. Бу ҳақда Мудофаа вазирлиги хабар берди.
Таъкидланишича, «Термиз» дала ўқув майдонида Сурхондарё вилояти ҳудудидаги ҳарбий қисмлар ҳаво ҳужумидан мудофаа бўлинмалари билан авиациянинг интенсив учиш ҳудудларида дала ўқув йиғинга старт берилган.
Соҳа масъул офицери подполковник Сарвар Тоштемировнинг сўзларига кўра, қўшинларнинг жанговар тайёргарлик даражасини дунёнинг энг илғор армиялари билан тенглаштириш учун ҳарбий қисм ва муассасаларда барча моддий-техник асослар, ҳарбий хизматчилар учун зарур шароитлар яратилган.
Дала ўқув йиғинини ўтказишдан асосий мақсад тўпланган тажрибаларни янада мукаммаллаштириш, жанговар ҳаракатларни ташкиллаштириш ва уларни замонавий шароитларда ҳар томонлама таъминлаш бўйича эгалланган билимларни мустаҳкамлашдан иборат.
«Шу куннинг ўзида йиғин иштирокчилари билан саф тайёргарлиги, жисмоний тайёргарлик машғулотларини янгича усулларда олиб бориш бўйича амалий машғулотлар бўлиб ўтди. Саф тайёргарлиги давомида ҳарбий хизматчиларнинг уст-боши, ҳужжатлари, қуроллари кўрикдан ўтказилди. Ўқув-услубий йиғин давом этмоқда», — дейилади хабарда.
Эслатиб ўтамиз, июнь охирларида Мудофаа вазирлиги Ўзбекистон армиясининг жанговар шайлигини текширганди. Август бошида эса Россия ва Ўзбекистон махсус кучлари ўзбек-афғон чегарасидаги шартли террорчиларни яксон қилган эди.
Изоҳ (0)