Janubi-g‘arbiy maxsus harbiy okrugi qo‘mondoni o‘rinbosarining tegishli buyrug‘iga asosan Surxondaryoning “Termiz” poligonida keng ko‘lamli o‘quv-uslubiy yig‘in boshlandi. Bu haqda Mudofaa vazirligi xabar berdi.
Ta’kidlanishicha, “Termiz” dala o‘quv maydonida Surxondaryo viloyati hududidagi harbiy qismlar havo hujumidan mudofaa bo‘linmalari bilan aviatsiyaning intensiv uchish hududlarida dala o‘quv yig‘inga start berilgan.
Soha mas’ul ofitseri podpolkovnik Sarvar Toshtemirovning so‘zlariga ko‘ra, qo‘shinlarning jangovar tayyorgarlik darajasini dunyoning eng ilg‘or armiyalari bilan tenglashtirish uchun harbiy qism va muassasalarda barcha moddiy-texnik asoslar, harbiy xizmatchilar uchun zarur sharoitlar yaratilgan.
Dala o‘quv yig‘inini o‘tkazishdan asosiy maqsad to‘plangan tajribalarni yanada mukammallashtirish, jangovar harakatlarni tashkillashtirish va ularni zamonaviy sharoitlarda har tomonlama ta’minlash bo‘yicha egallangan bilimlarni mustahkamlashdan iborat.
“Shu kunning o‘zida yig‘in ishtirokchilari bilan saf tayyorgarligi, jismoniy tayyorgarlik mashg‘ulotlarini yangicha usullarda olib borish bo‘yicha amaliy mashg‘ulotlar bo‘lib o‘tdi. Saf tayyorgarligi davomida harbiy xizmatchilarning ust-boshi, hujjatlari, qurollari ko‘rikdan o‘tkazildi. O‘quv-uslubiy yig‘in davom etmoqda”, — deyiladi xabarda.
Eslatib o‘tamiz, iyun oxirlarida Mudofaa vazirligi O‘zbekiston armiyasining jangovar shayligini tekshirgandi. Avgust boshida esa Rossiya va O‘zbekiston maxsus kuchlari o‘zbek-afg‘on chegarasidagi shartli terrorchilarni yakson qilgan edi.
Izoh (0)