Туркманистон президенти Гурбангули Бердимуҳамедов яқин кунларда расмий ташриф билан Ўзбекистонга келиши кутилмоқда. Turkmenportal’нинг Туркманистон давлат ахборот агентлигига таяниб хабар беришича, бу ҳақда 7 сентябрь куни ўтказилган йиғилишда Гурбангули Бердимуҳамедов маълум қилган.
Қайд этилишича, ташриф давомида ҳамкорлик тўғрисидаги ҳужжатлар тўплами имзоланади. Шу муносабат билан Гурбангули Бердимуҳамедов бош вазир ўринбосари Эсенмурат Ўразгелдиэвга келаси ҳафта бўлиб ўтадиган савдо-иқтисодий, илмий-техникавий ва маданий ҳамкорлик бўйича ўзбек-туркман қўшма комиссияси йиғилишида ўзбекистонлик ҳамкасби билан имзоланишга тайёрланаётган келишувларни муҳокама қилишни топширди.
Туркманистон президенти сўнгги марта Ўзбекистонга 2019 йил ноябрь ойида ташриф буюрган. 2021 йилнинг август ойида икки давлат раҳбари Каспий денгизи соҳилидаги Аваза миллий сайёҳлик зонасида Марказий Осиё давлатлари президентларининг учинчи маслаҳат учрашуви доирасида учрашганди.
Учрашувда аввал эришилган келишувларнинг бажарилиш ҳолати кўриб чиқилди. Ижобий ўсиш суръатларни давом эттириш учун янги лойиҳалар ишлаб чиқиш, чегарадош ҳудудлар ва ишбилармонлар ўртасидаги алоқаларни фаоллаштириш кераклиги таъкидланди. Транспорт-логистика инфратузилмасини ривожлантириш, Жанубий Осиё ва Жанубий Кавказ йўлаклари орқали янги ташқи бозорларга чиқиш, шу жумладан, Ашхобод битимига мувофиқ халқаро транспорт ва транзит йўлагини яратиш истиқболлари муҳокама қилинган.
Учрашувдан сўнг Шавкат Мирзиёев Гурбангули Бердимуҳамедовни ўзи учун қулай вақтда расмий ташрифи билан Ўзбекистонга келишни таклиф этган.
Изоҳ (0)