Наманган вилоятининг Учқўрғон туманида нуронийлар, ўрта ва ёш авлод ҳамда турли миллат вакиллари иштирокида «Уч авлод учрашуви» бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Байрамона безатилган тадбир манзилида вилоятнинг барча шаҳар-туманлари, йирик ишлаб чиқарувчилар, корхона ва ташкилотлар, олий ўқув юртлари ўз кўргазмалари билан қатнашди.
Наманганда фаолият олиб бораётган миллий-маданий марказлар, фолклор жамоаларининг чиқишлари намойиш этилди. Турли тилларда куй-қўшиқлар, лапар ва ўланлар янгради.
Турфа таомлар, жумладан, Чуст оши, Норин сомсаси, Мингбулоқ балиғи меҳмонларга тортиқ қилинди.
Тадбирда Президент маслаҳатчиси Турсунхон Худойберганов, Наманган вилояти ҳокими Шавкат Абдураззоқов, Қирғизистоннинг Ўзбекистондаги Фавқулодда ва мухтор элчиси Иброҳим Жунусов, Тожикистоннинг Ўзбекистондаги Фавқулодда ва мухтор элчиси Абдужаббор Раҳмонзода сўзга чиқди.
Улар ўз чиқишларида уч авлод ўртасида меҳр-оқибат ва ҳурмат-иззат ришталарини боғлаш, чегарадош давлатлар ва ҳудудлар ўртасидаги иқтисодий ва гуманитар алоқаларни янада мустаҳкамлаш масалаларига тўхталиб ўтди.
Мустақилликнинг 30 йиллигига бағишланган ушбу учрашувда Қирғизистон ва Тожикистондан нуфузли делегациялар иштирок этди. Жумладан, Қирғизистон делегацияси таркибидан мамлакат ҳукуматининг Жалолобод вилоятидаги ваколатли вакилининг биринчи ўринбосари, Ахси, Олабуқа, Навкент туманлари ҳокимлари, тадбиркорлар, Тожикистон делегацияси таркибидан эса Сўғд вилоятининг ўзбеклар миллий маркази, маҳаллий ОАВ раҳбарлари ўрин олди.
«Уч авлод» учрашуви ёш хонандалар ва таниқли санъат усталарининг концерт дастури билан давом этди. Концертнинг авж палласи Қирғизистоннинг Ўзбекистондаги элчиси Иброҳим Жунусов саҳнага чиқиб, микрофонни қўлига олган пайтга тўғри келди.
Элчи ижросидаги «Жон болам» деб номланган қўшиқ меҳмон ва мезбонлар томонидан олқишлар билан кутиб олинди.
Тадбирдан сўнг Қирғизистон ва Тожикистондан келган меҳмонлар Намангандаги бир қатор йирик корхона ва компаниялар фаолияти билан танишди.
Изоҳ (0)