Бухоро вилояти Қоровулбозор туманида кўп миқдордаги марихуана гиёҳвандлик моддасини қонунга хилоф равишда сақлаб келаётган шахс аниқланди. Бу ҳақда ИИВ матбуот хизмати хабар берди.
Маълум қилинишича, Бухоро вилояти ИИБ тезкор ходимлари томонидан ўтказилган «Қорадори—2021» тадбири давомида олинган тезкор маълумот асосида 1975 йилда туғилган С.Ж. раҳбарлик қилиб келаётган фермер хўжалиги токзорлари кўздан кечирилган.
Кўздан кечириш давомида ушбу фермернинг токзорлари орасида бир дона полимер қоп ва бир дона полиэтилен пакетда вилоят ИИБ эксперт-криминалистика бўлимининг судга оид кимёвий экспертиза хулосасига кўра, соф вазни 3 килограмм 480 граммга тенг бўлган кўп миқдордаги марихуана гиёҳвандлик моддасини қонунга хилоф равишда сақлаб келаётгани аниқланган.
Мазкур ҳолат юзасидан С.Ж. га нисбатан Жиноят кодексининг 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай, қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Аввалроқ Бухорода хонадонини бангихонага айлантирган шахсларга нисбатан жиноий иш қўзғатилгани ҳақида хабар берилган эди. Шунингдек, ДХХ Бухоро, Фарғона ва Наманган вилоятларида гиёҳванд моддалар савдоси билан шуғулланган бир неча шахсни қўлга олганди.
Изоҳ (0)