Тошкент вилояти ҳокимлиги хизмат машиналари учун Chevrolet Malibu ва Tracker автомобилларини сотиб олди. «Gazeta.uz»нинг вилоят ҳокими Даврон Ҳидоятовнинг 26 августдаги қароридан келиб чиқиб ёзишича, харид маҳаллий бюджет даромадларининг иккинчи чорак учун ошириб бажарилган қисми ҳисобидан амалга оширилган.
Қайд этилишича, Даврон Ҳидоятов «ҳоким ўринбосарлари фаолиятини самарали амалга ошириш ва ҳудудларда тегишли ишларни ташкил этиш учун» ҳоким ўринбосарларига иккита хизмат машинасини сотиб олиш учун 610 миллион сўм ажратди.
Давлат харидлари портали маълумотларида келтирилишича, 369 миллион сўмлик Malibu-2 (LTZ) ва 232 миллион сўмлик Tracker-2 АТ сотиб олиш бўйича шартномалар 6 сентябрда имзоланган.
Маълумот учун, Вазирлар Маҳкамаси 29 апрель куни давлат хизматчиларининг хизмат автомобиллари нархининг чекланган миқдори ва йиллик ҳаракатланиш лимитини назарда тутувчи қарорни имзолаган. Унга кўра, ҳокимлар ўринбосарлари учун автомобилнинг нархи БҲМнинг 2000 бараваридан, (540 миллион сўм, 1 сентябрдан буён БҲМ 270 минг сўмни ташкил этади) двигатели қуввати 4000 куб сантиметрдан ошмаслиги керак. Уларнинг ўринбосарлари учун эса БҲМнинг 1500 бараваридан (405 миллион сўм), двигатели қуввати эса 2500 куб сантиметрдан ошмаслиги лозим.
Эслатиб ўтамиз, 2020 йил ноябрь ойи бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-AT, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-AT русумли автомобиль харид қилган.
Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ички ишлар бошқармаси бошлиғига 621 миллион сўмга 3 та Tracker хизмат машиналари сотиб олган.
Изоҳ (0)