«Толибон» ҳаракати Афғонистон шимолидаги Панжшер вилоятини тўлиқ ўз назоратига олди. Бу ҳақда ҳаракатнинг матбуот котиби Забиҳулла Мужоҳид 6 сентябрь, душанба куни маълум қилди. Вилоят Афғонистонда «Толибон»га бўйсунмаётган сўнгги ҳудуд эди.
«Охирги қалъа — Панжшер вилояти бутунлай эгалланди», — дейилади хабарда. Унда, шунингдек, «вилоятдаги исёнчиларнинг бир қисми мағлуб этилгани, қолганлари эса қочиб кетгани» айтилган.
Ўз навбатида, Афғонистоннинг Asvaka агентлиги хабар беришича, «Толибон» аллақачон Панжшер губернаторлиги биноси устида ўз байроғини кўтарган.
Айни пайтда, Afghanistan Urdu манбаларига кўра, вилоят учун кечган жангларда ҳар икки томоннинг кўплаб нуфузли командирлари ҳалок бўлган. Улар орасида «Толибон»нинг юқори мартабали командири, Панжшер операцияси учун масъул бўлган Қори Фасиҳуддин ҳам бор, лекин «Толибон» бу маълумотни ҳали тасдиқламаган.
Панжшер Афғонистонда «Толибон» ҳукмронлиги ўрнатилмаган ягона минтақа эди. Вице-президент Амрулла Солиҳ ва «Толибон»га қарши коалициянинг собиқ раҳбари Аҳмад Шоҳ Масъуднинг ўғли Аҳмад Масъуд қаршилик кучларига раҳбарлик қилаётганди. Афғонистон президенти Ашраф Ғани қочиб кетганидан сўнг, Солиҳ ўзини давлат раҳбари деб эълон қилган ва «Толибон»га қуролли қаршилик кўрсатишга чақирган.
22 август куни «Толибон» панжшерликларга ультиматум эълон қилиб, тўрт соат ичида таслим бўлишни талаб қилганди. Масъуд Панжшер етакчилари вилоятни топшириб қўймаслигини билдирди. Кейинроқ «Толибон» ҳудудга юзлаб жангчиларни юборганини маълум қилиб, вилоятни қамал қилишни бошлади. «Толибон» Панжшер аҳолисини интернетдан узиб қўйди, ҳудудда мобил алоқа ишлашдан тўхтади.
Масъуд воқеалар ривожи тинч бўлишига умид билдирди, аммо «ҳарбий вариант»ни ҳам истисно қилмади ва қаршилик кучлари эҳтимолий ҳужумларни қайтаришга тайёрланаётганини қайд этди.
1 сентябрь куни Афғонистоннинг Bakhtar News Agency ахборот агентлиги манбаларини ошкор қилмаган ҳолда «Толибон» Панжшерда операция бошлаб, Шутул туманини эгаллаб олгани ҳақида хабар берганди. Қаршилик кучлари вакиллари, ўз навбатида, «Толибон» водийга бостириб киришга урингани, аммо уларнинг ҳужуми муваффақиятли тарзда даф этилганини маълум қилганди.
Изоҳ (0)