Ғарбий Африкада жойлашган Гвинея Республикасида 5 сентябрь, якшанба куни эрталаб президент Альфа Конде қароргоҳи яқинида отишма юз берди. Бу ҳақда Reuters гувоҳларга таяниб хабар берди. Jeune Afrique журнали ўз манбаларига таяниб ёзишича, гап давлат тўнтаришига уриниш ҳақида бормоқда.
Jeune Afrique маълумотларига кўра, полковник Мамади Думбуя раҳбарлигидаги GPS махсус топшириқли бўлинма жангчилари ўт очган. Reuters’га хабар берган гувоҳлар сўзларига кўра, ҳарбийлар мамлакат пойтахти Конакри кўчаларида патруллик қилмоқда. Шунингдек, агентлик манбаси маълум қилишича, президент қароргоҳи ва бир нечта вазирликлар бинолари жойлашган туманга олиб борадиган ягона кўприк ҳарбийлар томонидан тўсиб қўйилган.
Президент Альфа Конде жабр кўрмаган, дея агентликка юқори мансабли амалдор маълум қилган, аммо бошқа тафсилотларни ошкор қилмаган. Jeune Afrique маълумотлари бўйича президентнинг аҳволи яхши ва ўз соқчилари ҳимояси остида.
Кейинроқ президент Альфа Конде давлат тўнтариши уюштирган бир гуруҳ ҳарбийлар томонидан қўлга олингани хабар берилди. Бу ҳақда «Maliactu.net» журналисти Сега Даярия ўз Twitter’ида маълум қилган ва қўзғолон кўтарган ҳарбийлар томонидан эълон қилинган видеони илова қилган. Президент қўлга олингани ҳақида Guineenews нашри ҳам хабар берган.
Қўзғолончилар етакчиси полковник Мамади Думбуя мамлакатда конституция амал қилишдан тўхтаганини ва чегаралар ёпилганини эълон қилди.
Нашрнинг ёзишича, Конде биринчи марта фитнага уринишга дуч келмаяпти, хусусан, 2011 йилда унинг уйига ҳужум қилинган.
83 ёшли Конде ҳокимият тепасига 2010 йилда келган. 2020 йилда конституцияга киритилган тузатишлар шарофати билан учинчи муддатга қайта сайланган, ушбу тузатиш эса мамлакатда норозиликларга сабаб бўлган.
Полковник Мамади Думбуя илгари Франция хорижий легионида хизмат қилган, 2018 йилда эса GPS устидан қўмондонликни ўз қўлига олиш учун Гвинеяга қайтиб келган.
Эслатиб ўтамиз, май ойида Малида тўққиз ой ичида иккинчи марта ҳарбий тўнтариш юз берди. Тўнтаришдан кейин комендантлик соати ўрнатилиб, ташқи чегаралар ёпилди. Июлда эса Мали президенти вазифасини вақтинча бажарувчи, полковник Ассими Гойтага мамлакат пойтахти Бамакодаги масжидда суиқасд уюштирилди.
Бундан ташқари, июль бошида Гаити президенти Жовенел Моиз ўз қароргоҳида отиб ўлдирилди.
Изоҳ (0)