Глобал исиш ва абадий музликнинг эриши номаълум вирусларнинг «уйғониши»га олиб келиши мумкин, бу эса инсоният учун олдиндан айтиб бўлмайдиган оқибатларни келтириб чиқаради, деди тинчлик бўйича Нобель мукофоти совриндори Рае Квон Чунг.
Унинг сўзларига кўра, «ибтидоий даврда ёки юз минглаб йил аввал мавжуд бўлган» қайси вирус яна пайдо бўлишини башорат қилиб бўлмайди.
«Улар қайтади. Ишончим комилки, биз илгари ҳеч қачон тўқнаш келмаган жуда турли-туман вируслар мавжуд», — деди олим.
Унинг фикрича, хавф зонасида Сибир ҳам бўлиб, у ерда тайга ва тундра музликларининг эриши туфайли, қадимий касалликлар ва вируслар «уйғониши» мумкин. Инсоният бундай синовларга тайёр туриши ва уларга тезкорлик билан жавоб қайтариши керак, дея хулоса қилди Рае Квон Чунг.
У 2007 йилда Иқлим ўзгариши бўйича ҳукуматлараро экспертлар гуруҳи таркибида Нобель мукофотига сазовор бўлган эди. Мукофот инсон фаолияти оқибатида иқлим ўзгариши ҳақидаги билимларни тўплаш ва тарқатиш бўйича саъй-ҳаракатлар учун берилганди.
Аввалроқ Бирлашган Миллатлар Ташкилотининг Иқлим ўзгариши бўйича ҳукуматлараро гуруҳи кўплаб иқлим ўзгаришлари доимий бўлиб қолиши ҳақида огоҳлантирувчи ҳисобот эълон қилган эди. Ҳисоботга кўра, «кузатилган кўплаб иқлим ўзгаришлари минглаб, ҳатто юз минг йиллар давомида мисли кўрилмаган даражада», бошланган кўплаб ўзгаришларни эса масалан, денгиз сатҳининг кўтарилишини, «юз минг йиллар давомида қайтариб бўлмайди».
Шунингдек, олимлар Арктикада ҳаво ҳарорати сайёранинг бошқа минтақаларига қараганда тезроқ қизиётганини маълум қилганди. Бу жараён эса сайёрадаги об-ҳаво учун салбий оқибатларга олиб келиши мумкин.
Изоҳ (0)