«Ўзбекнефтгаз» АЖ бошқаруви раисининг топшириғига асосан, 2017—2021 йилларда углеводород хомашёсини қазиб чиқаришни кўпайтириш дастури доирасида, табиий газ ва газ конденсатини қазиб чиқариш ҳажмини ошириш мақсадида соҳада кенг кўламли ишлар амалга оширилмоқда.
Хусусан, Устюрт газ қазиб чиқариш бошқармасига қарашли «Қуйи Сургил», «Аралиқ» ва «Ғарбий Қуйи Сургил» каби истиқболли конлар ҳисобига табиий газ қазиб чиқариш ҳажми ортишини инобатга олиб, «Арслон» газни комплекс тайёрлаш қурилмасидан «Ўзтрансгаз» АЖ магистрал газ қувурларигача бўлган оралиқда қўшимча товар газ қувурини кенгайтириш эҳтиёжи пайдо бўлди.
Шу сабабли, бош пудратчи Eriell Oilfield Services Middle East DMCC компанияси билан ҳамкорликда «Арслон» газни комплекс тайёрлаш қурилмасидан «Ўзтрансгаз» АЖ магистрал газ қувурларига тозаланган табиий газ узатиш қувурларининг газ ўтказиш қувватлари оширилди.
«2017—2021 йилларда углеводород хомашёсини қазиб чиқаришни кўпайтириш дастури доирасида лойиҳалаштирилган 17 километр узунликдаги, диаметри 530 миллиметрли газ қувури ва газ қувурини суюқликлар, механик аралашмалардан тозалаш учун поршен юбориш, қабул қилиш қурилмалари ҳамда газ сарфини ўлчаш қаторлари қурилиб, ишга туширилди.
Ушбу газ қувурини ишга туширилиши натижасида «Арслон» газни комплекс тозалаш қурилмасидан Бухоро—Урал магистрал газ қувурнинг газ ўтказиш қувватини ошириш билан қувурларда газ босимлари фарқининг ўсиши, яъни гидравлик қаршиликларнинг олди олиниши ҳамда «Узтрансгаз» АЖ магистрал газ қувурларига паст босимда етказиб бериш эвазига, кунлик 200 минг куб метр табиий газ қазиб чиқариш ҳажмининг кўпайишига эришилди.
Бундан ташқари, босимлар фарқи камайиши натижасида Устюрт регионидан қазиб олинаётган газ ҳажмларини транспортировка қилиш тизимининг барқарорлиги ҳамда «Ўзтрансгаз» ва Устюрт газ-кимё мажмуасига узатиладиган табиий газ сифат кўрсаткичларининг яхшиланишига эришилди.
Маълумот учун: «Арслон» кони Қарақалпоғистон Республикаси, Мўйноқ тумани ҳудудида жойлашган бўлиб, 2015 йилда ишга туширилган.
«Ўзбекнефтгаз» АЖ матбуот хизмати
Изоҳ (0)