Тожикистон президенти Эмомали Раҳмон Афғонистон собиқ президенти Бурхониддин Раббонийни ва ҳаётлиги чоғида «Толибон»га қарши курашган дала қўмондони Аҳмадшоҳ Масъудни I даражали Исмоил Сомоний ордени билан мукофотлади. Бу ҳақда давлат раҳбари сайтида хабар берилди, деб ёзади «РБК». Мукофот Тожикистон мустақиллигининг 30 йиллиги муносабати билан тақдим этилди.

Эмомали Раҳмон

Фото: Reuters

Иккаласи ҳам тожик миллатига мансуб бўлгани, Раббоний ва Масъуд 1990 йилларда Тожикистондаги зиддиятни тартибга солишга қўшган ҳиссаси учун орденга лойиқ топилди, — дейилади президент сайтида.

Исмоил Сомоний ордени Тожикистондаги олий давлат мукофоти ҳисобланади.

Олий тинчлик кенгашига раҳбарлик қилган Афғонистон собиқ президенти 2011 йил сентябрида ўлдирилган эди. У портлаш оқибатида ҳалок бўлган, ҳодиса чоғида Раббоний «Толибон» вакиллари билан учрашув ўтказаётган эди. Полиция талқинига кўра, салла ичига яширилган бомбани, эҳтимол, улардан бири олиб кирган.

Панжшер арслони деб лақаб берилган Аҳмадшоҳ Масъуд 1990 йилларда шимолий Афғонистонда «Толибон»га қарши уруш олиб борувчи гуруҳлар бирлашмаси — «Шимолий альянс»га раҳбарлик қилган. У 2001 йилда ўлдирилган.

Ҳозир Аҳмадшоҳ Масъуднинг ўғли — Аҳмад Масъуд Панжшер вилоятида «Толибон»га қаршилик кучлари етакчиси ҳисобланади. У «Толибон» жангарилари август ўрталарида Афғонистонни эгаллаб олганини эълон қилганидан сўнг жангарилар назорати остига кирмаган ягона ҳудуд бўлиб келмоқда.

Аввалроқ Афғонистоннинг «Толибон»га бўйсунмаган Панжшер вилоятидаги қаршилик кучлари билан тўқнашувларда ҳаракатнинг 300 дан ортиқ аъзоси йўқ қилингани хабар берилганди. Ҳаракат вакиллари томонидан Панжшер губернатори этиб тайинланган «Толибон» етакчилик комиссияси раҳбари Амир Хон Моттакийнинг 1 сентябрь куни маълум қилишича, «Толибон» ва қаршилик вакиллари ўртасида ўтган ҳафта бошланган музокаралар муваффақиятсизликка учраган.

Шунингдек, «Толибон» назорати остига ўтмаган Панжшер вилоятидаги қаршилик кучлари етакчиси Аҳмад Масъуд агар «Толибон» барча афғонларга тенг ҳуқуқлилик тақдим этиб, инклюзив ҳукумат тузса, қаршилик кўрсатишни тўхтатишга тайёрлигини билдирди.