Жаҳон соғлиқни сақлаш ташкилоти (ЖССТ) SARS-CoV-2 коронавирусининг «колумбияча» штаммини (B.1.621) қизиқиш уйғотган вариантлар (VOI — Variants of Interest) рўйхатига киритди ва унга грекча «мю» идентификаторини берди.
GISAID маълумотлар базасида қайд этилишича, ушбу штамм биринчи марта 2021 йилнинг январь ойида Колумбияда топилган, ўшандан бери бутун дунё бўйлаб 3700 дан ортиқ кишида аниқланган. Штамм биринчи навбатда Марказий ва Лотин Америкаси мамлакатларида, шунингдек, АҚШда 1,4 мингдан ортиқ кишида қайд этилган. Колумбияда «мю» варианти COVID-19 га чалиниш бўйича барча ҳолатларнинг 39 фоизини (842) ташкил этиш билан устунлик қилмоқда. Бу тур Европада ҳам топилган.
Июль ойининг охирида Journal of Medical Biology’да эълон қилинган мақолага кўра, Рим биотиббиёт университети ва Брешиа университети шифокорлари томонидан ўтказилган тадқиқотда Pfizer вакцинаси билан эмланган беморлар организми «мю» штаммига яхши қаршилик кўрсатган. Уларнинг фикрича, коронавируснинг ушбу варианти вакциналарнинг самарадорлигига таҳдид солмайди.
Тадқиқотда қайд этилишича, ушбу вариантда коронавируснинг ҳам янги, ҳам аввалдан маълум мутациялари мавжуд.
Июль ойи охирида Флоридадаги йирик тиббий фонд Jackson Health Systems раҳбари Карлос Мигоя маҳаллий WPLG телеканалига маълум қилишича, «колумбияча» штамм Майами университетида текширувдан ўтаётган COVID-беморларнинг 10 фоизида қайд этилмоқда. Колумбия билан фаол алоқалар туфайли «мю» варианти шаҳарда дельта ва гамма вариантларидан кейин учинчи ўринни эгаллади, деди шифокор.
ЖССТнинг қизиқиш уйғотган штаммлар (ВОИ) рўйхатига тез-тез ва тобора кенгроқ ҳудудда қайд этилаётган, шу билан бирга улардаги мутациялар коронавирус хусусиятларини ўзгартириш қобилиятига эга экани тўғрисида прогноз ёки тасдиқланган маълумотлар мавжуд вариантлар киради.
Ҳозир рўйхат «мю»дан ташқари, яна тўртта штаммни ўз ичига олади — «эта» (Буюк Британияда ва Нигерияда биринчи марта қайд этилган), «йота» (АҚШ), «каппа» (Ҳиндистон) ва «лямбда» (Перу).
ЖССТнинг хавотирга солувчи штаммлар (VOC) рўйхатида эса коронавируснинг энг хавфли вариантлари таснифланади. Бундай штаммларда коронавируснинг одамдан одамга тарқалиш қобилиятини оширган ва унинг эпидемиологиясини ўзгартирган, янги ташувчиларни вирус юқтириш эҳтимолини оширган ва симптомларни ўзгартирган ёки вирусни вакциналарга, дориларга ва бошқа қарши чораларга чидамлилигини оширган мутациялар мавжуд бўлади. Ҳозирги вақтда SARS-CoV-2 нинг тўртта штамми ЖССТни ташвишга солмоқда: улар Британияда аниқланган альфа, биринчи марта Бразилияда қайд этилган бетанинг Жанубий Африка варианти, гамма ва Ҳиндистонда аниқланган дельта штаммлари.
Бундан ташқари ЖССТнинг мониторинг (Alerts for Further Monitoring) рўйхати ҳам мавжуд бўлиб, унга киритилган COVID-19 штаммларининг мутациялари вирус хусусиятларини ўзгартириши ва келажакда хавф туғдириши мумкин бўлса-да, лекин уларни VOI рўйхатига киритиш учун етарлича маълумот йўқ.
Ҳозирги вақтда кузатувлар рўйхатида қўшимча ўрганишни талаб қиладиган 13 та штамм мавжуд.
ЖССТ маълум қилишича, айни вақтга қадар коронавируснинг дельта штамми камида 170 та мамлакат ва ҳудудларда аниқланган. Қайд этилишича, 170 та мамлакатдан 7 тасида дельта вариант биринчи марта қайд этилган.
Дунё бўйлаб тарқалган коронавируснинг бошқа штаммлари бўйича статистик маълумотлар қуйидагича:
- альфа вариант (биринчи марта Буюк Британияда топилган) — 193 мамлакат ва ҳудудларда;
- бета вариант (биринчи марта Жанубий Африкада қайд этилган) — 141 та мамлакат ва ҳудудларда;
- гамма вариант (биринчи марта Бразилияда аниқланган) — 91 мамлакат ва ҳудудларда қайд этилган.
Изоҳ (0)