Tojikiston prezidenti Emomali Rahmon Afg‘oniston sobiq prezidenti Burxoniddin Rabboniyni va hayotligi chog‘ida “Tolibon”ga qarshi kurashgan dala qo‘mondoni Ahmadshoh Mas’udni I darajali Ismoil Somoniy ordeni bilan mukofotladi. Bu haqda davlat rahbari saytida xabar berildi, deb yozadi “RBK”. Mukofot Tojikiston mustaqilligining 30 yilligi munosabati bilan taqdim etildi.
Ikkalasi ham tojik millatiga mansub bo‘lgani, Rabboniy va Mas’ud 1990-yillarda Tojikistondagi ziddiyatni tartibga solishga qo‘shgan hissasi uchun ordenga loyiq topildi, — deyiladi prezident saytida.
Ismoil Somoniy ordeni Tojikistondagi oliy davlat mukofoti hisoblanadi.
Oliy tinchlik kengashiga rahbarlik qilgan Afg‘oniston sobiq prezidenti 2011-yil sentabrida o‘ldirilgan edi. U portlash oqibatida halok bo‘lgan, hodisa chog‘ida Rabboniy “Tolibon” vakillari bilan uchrashuv o‘tkazayotgan edi. Politsiya talqiniga ko‘ra, salla ichiga yashirilgan bombani, ehtimol, ulardan biri olib kirgan.
Panjsher arsloni deb laqab berilgan Ahmadshoh Mas’ud 1990-yillarda shimoliy Afg‘onistonda “Tolibon”ga qarshi urush olib boruvchi guruhlar birlashmasi — “Shimoliy alyans”ga rahbarlik qilgan. U 2001-yilda o‘ldirilgan.
Hozir Ahmadshoh Mas’udning o‘g‘li — Ahmad Mas’ud Panjsher viloyatida “Tolibon”ga qarshilik kuchlari yetakchisi hisoblanadi. U “Tolibon” jangarilari avgust o‘rtalarida Afg‘onistonni egallab olganini e’lon qilganidan so‘ng jangarilar nazorati ostiga kirmagan yagona hudud bo‘lib kelmoqda.
Avvalroq Afg‘onistonning “Tolibon”ga bo‘ysunmagan Panjsher viloyatidagi qarshilik kuchlari bilan to‘qnashuvlarda harakatning 300 dan ortiq a’zosi yo‘q qilingani xabar berilgandi. Harakat vakillari tomonidan Panjsher gubernatori etib tayinlangan “Tolibon” yetakchilik komissiyasi rahbari Amir Xon Mottakiyning 1-sentabr kuni ma’lum qilishicha, “Tolibon” va qarshilik vakillari o‘rtasida o‘tgan hafta boshlangan muzokaralar muvaffaqiyatsizlikka uchragan.
Shuningdek, “Tolibon” nazorati ostiga o‘tmagan Panjsher viloyatidagi qarshilik kuchlari yetakchisi Ahmad Mas’ud agar “Tolibon” barcha afg‘onlarga teng huquqlilik taqdim etib, inklyuziv hukumat tuzsa, qarshilik ko‘rsatishni to‘xtatishga tayyorligini bildirdi.
Izoh (0)