«Толибон» ҳаракати Ўзбекистон халқи ва раҳбариятини Мустақилликнинг 30 йиллиги билан табриклади. Бу ҳақда Ташқи ишлар вазирлиги вакили Юсуф Кабулжанов хабар берди.
Унинг маълум қилишича, Афғонистон Ислом Амирлиги музокаралар гуруҳи аъзоси ва «Толибон» ҳаракати сиёсий идораси матбуот котиби Муҳаммад Суҳайл Шаҳин шу муносабат билан ўз раҳбарияти номидан табрик мактуби йўллади.
«Биродар Ўзбекистон Республикаси раҳбарияти ва халқини Мустақиллик байрами билан самимий табриклаймиз.
Биз қўшни Ўзбекистон билан самарали ва дўстона муносабатлар ўрнатишни хоҳлаймиз. Ўзбекистон иштирокида Афғонистонда инфратузилма лойиҳаларини амалга ошириш, хусусан, темир йўл ва электр узатиш тармоқларини қуришни давом эттиришдан манфаатдорлигимизни тасдиқлаймиз. Афғонистон Ислом Амирлиги томонидан ўзбек шерикларимизга бу йўналишда барча зарур ёрдам кўрсатилади», — дейилган табрик мактубида.
Ўзбекистон мустақиллигининг 30 йиллиги муносабати билан Президент Шавкат Мирзиёев номига хорижий давлатлар ва ҳукуматлар, нуфузли халқаро ташкилотлар раҳбарлари, таниқли жамоат ва дин арбобларидан самимий қутловлар келиши давом этмоқда.
Изоҳ (0)