Самарқандда дрифт қилган Lacetti ва Nexia ҳайдовчиларига чора кўрилди, машиналар жарима майдонига жойлаштирилди (видео)

Самарқанд шаҳрида тунги вақтда фуқаролар тинчини бузиб, дрифт қилган ҳайдовчилар жавобгарликка тортилди, деб хабар беради ИИВ ахборот хизмати.

Ижтимоий тармоқларда Самарқанд шаҳрининг Регистон майдони олдида Lacetti-Gentra ва Nexia автомобилларини кескин бошқариб, дрифт қилгани тасвирланган видео тарқалди. Ҳолат бўйича Самарқанд вилояти ИИБ, ЙҲХБ, Хавфсиз туризмни таъминлаш бошқармаси томонидан суриштирув ишлари олиб борилган.

Натижада мазкур транспорт воситалари ҳайдовчилари топилиб, уларга нисбатан маъмурий баённомалар расмийлаштирилган ва машиналар жарима майдончасига жойлаштирилган.

Аввалроқ Тошкент вилоятида рақамларини беркитиб дрифт-шоу уюштирган ҳайдовчилар жазолангани, ноқонуний пойга уюштирган шахсларга нисбатан чора кўрилгани, Бухорода TikTok учун дрифт қилган ҳайдовчига чора кўрилиб, «Жигули»си жарима майдонига жойлаштирилгани ҳақида хабар берилган эди.