Бухорода фуқарони алдаб, уни Ғиждувон Тиббиёт коллежига ўқишга киритиш учун пора билан қўлга олинган шахс ҳолат юзасидан терговга қадар ҳаракатлар давом этаётган бир вақтда яна такроран жиноят содир этди. Ҳолат вилоят ҳуқуқни муҳофаза қилиш идоралари томонидан ҳамкорликда ўтказилган тадбирда аниқланган, дея хабар бермоқда «Дарё» мухбири.
Таъкидланишича, 12 август куни Ғиждувон туманида яшовчи Р.Ш. исмли шахс фуқаро О.Қ.ни ўзининг ваколатли танишлари орқали Ғиждувон Тиббиёт коллежига ўқишга киритишни ваъда қилган. Бунинг эвазига у О.Қ.дан 400 доллар сўраган. Р.Ш. Ғиждувон тумани марказидаги «Уч юлдуз» кафеси олдида ушбу келишилган 400 долларни олаётган вақтда ҳуқуқни муҳофаза қилиш идоралари томонидан қўлга олинган.
Олиб борилган суриштирув ҳаракатлари давомида Р.Ш. ҳаракатларида фирибгарлик ва пора беришга далолат қилиш жинояти аломатлари мавжудлиги аниқланган. Унга нисбатан Жиноят кодексининг 168-моддаси (фирибгарлик) 1-қисми ҳамда 28-(жиноят иштирокчиларининг турлари), 211- (пора бериш) моддасининг 1-қисми билан жиноят иши қўзғатилиб, ишга оид тўпланган ҳужжатлар Шофиркон тумани прокуратурасига юборилган.
Тергов ҳаракатлари давом этаётган бир вақтда Р.Ш. худди шундай кейинги жиноятни 18 август куни такроран содир этган. Бу сафар у ғиждувонлик фуқаро М.С.га уни туман тиббиёт коллежига ўқишга кирита олишига ишонтириб, 300 доллар талаб қилган. 300 долларни фуқаро М.С.дан тумандаги «Нодирабегим» маҳалласига олиб борувчи йўлда олаётган вақтда ашёвий далиллар билан қўлга олинган.
Аввалроқ Тошкент вилоятида юридик университетга 18 минг доллар эвазига ўқишга киритмоқчи бўлган шахс ва собиқ ўқитувчи ушлангани, Тошкентда фуқаронинг Қозоғистондаги ўқишини Самарқанд тиббиёт институтига кўчириб бериш эвазига 5 минг доллар олган шахс қўлга олингани тўғрисида хабар берилганди.
Изоҳ (0)