Шавкат Мирзиёев Ўзбекистон мустақиллигининг 30 йиллигига бағишланган тадбирда 2021 йил 24 октябрь куни бўлиб ўтадиган Президент сайлови ҳақида сўз юритди. Бу ҳақда «Дарё» мухбири хабар қилди.
«Сўнгги беш йил мобайнида мамлакатимиз миллий сайлов қонунчилигида жиддий ўзгаришлар юз берди. Нуфузли халқаро экспертлар таъкидлаганидек, янги Ўзбекистонда сайлов қонунчилигини изчил такомиллаштириш ҳамда сайловларни ўтказиш амалиёти сифат жиҳатидан янги поғонага кўтарилди.
Бу галги Президент сайловлари илк бор 2019 йилнинг 25 июнида қабул қилинган Сайлов кодекси асосида бўлиб ўтади.
Бу сайлов барчамиз учун Ўзбекистоннинг келгуси тараққиёти қандай йўлдан боради, фарзандларимиз, оиламиз, мамлакатимиз келажагини қандай барпо этамиз, деган ҳал қилувчи саволларга жавоб берадиган ғоят муҳим сиёсий тадбирдир. Шунинг учун ушбу сиёсий жараёнга кўп миллатли халқимиз ҳам, жаҳон ҳамжамияти ҳам катта қизиқиш ва эътибор билан қарамоқда.
Сайловда дунёнинг 50 га яқин мамлакати ҳамда ўнлаб халқаро ташкилотлардан кузатувчилар иштирок этиши кутилмоқда.
Шу маънода, бўлғуси сайловлар юксак демократик мезонлар асосида ўтади ҳамда янги Ўзбекистон халқининг ўсиб бораётган сиёсий тафаккурини, ижтимоий фаоллиги ва маданий савиясини яққол намоён этади, деб ишонаман», — дейди давлат раҳбари.
Маълумот учун, Ўзбекистон Президенти сайловида 5 та номзод иштирок этади. Булар: Ўзбекистон Экологик партиясидан Нарзулло Обломуродов, «Миллий тикланиш» демократик партиясидан Алишер Қодиров, Ўзбекистон Либерал-демократик партиясидан Шавкат Мирзиёев, Халқ демократик партиясидан Мақсуда Ворисова ҳамда «Адолат» социал-демократик партиясидан Баҳром Абдуҳалимов.
Изоҳ (0)