Narzullo Oblomurodov Ekopartiyadan prezidentlikka nomzod sifatida tasdiqlandi

O‘zbekiston Ekologik partiyasining 27-avgust, juma kuni bo‘lib o‘tgan III qurultoyida O‘zbekiston Prezidentligiga partiya markaziy kengashi ijroiya qo‘mitasi raisi Narzullo Oblomurodov nomzodi syezd delegatlarining ko‘pchilik ovozi bilan tasdiqlandi. Bu haqda “Daryo” muxbiri xabar bermoqda.

Qurultoyda milliy saylov qonunchiligining yangi tamoyillari, umume’tirof etilgan xalqaro standartlar asosida, ochiq va shaffof o‘tkazilishi, saylov kampaniyasi davrida barcha siyosiy partiyalar va ular tomonidan ko‘rsatilgan nomzodlar uchun sog‘lom raqobat muhiti, teng sharoit yaratilishi hamda prezident saylovida O‘zbekiston Ekologik partiyasi birinchi marta ishtirok etayotgani alohida ta’kidlandi.

Delegatlar partiyaning III plenumida qurultoyda ko‘rib chiqish uchun tavsiya etilgan partiya markaziy kengashi ijroiya qo‘mitasi raisi Narzullo Oblomurodovni partiyadan O‘zbekiston prezidentligiga nomzod sifatida tasdiqladi.

Qurultoyda prezidentlikka nomzod Narzullo Oblomurodov delegatlarni saylovoldi dasturi bilan tanishtirar ekan, saylovda nomzodning bosh shiori “Biz kelajak uchun javobgarmiz” ekanini ma’lum qildi.

Nomzodning saylovoldi dasturida asosiy e’tibor bir qator ekologik muammolarni bartaraf etish, aholining ekologik madaniyatini rivojlantirish kabi masalalarga qaratilgan. Xususan:

•  “yashil” iqtisodiyot tamoyillari asosida mamlakatni jadal rivojlantirishga yo‘naltirilgan siyosatni yuritish;
• aholini toza ichimlik suvi bilan ta’minlash qamrovini kengaytirish, oqova suvlarni tozalash inshootlarini modernizatsiya qilish hamda yangilarini qurish choralarini ko‘rish;
• chiqindilarni qayta ishlashga qaratilgan davlat siyosatini kuchaytirish;
• iqlim o‘zgarishlariga moslashish, Orol fojiasi oqibatlarini yumshatish va Orolbo‘yi mintaqasini ekologik innovatsiyalar va texnologiyalar hududiga aylantirish;
• atmosferaga tashlanmalarni kamaytirish, tabiiy resurslardan oqilona foydalanish;
• jamiyatda yuksak ekologik madaniyatni shakllantirish, ona tabiatni, jumladan, o‘simlik va hayvonot dunyosini asrab-avaylash, ularga nisbatan ehtiyotkorona munosabatda bo‘lish hissini kuchaytirish;
• global va transchegaraviy ekologik muammolarni hal qilishda xorijiy davlatlar, avvalambor, Markaziy Osiyo davlatlari bilan har tomonlama hamkorlikni yanada rivojlantirish masalalariga alohida e’tibor qaratish.

Delegatlar nomzodning saylovoldi dasturini bir ovozdan ma’qulladi. Syezd yakunida muhokama etilgan barcha masalalar yuzasidan tegishli qarorlar qabul qilindi.

Ma’lumot uchun, Narzullo Oblomurodov 1975-yili Samarqand viloyatida tug‘ilgan. 1996-yilda Jahon iqtisodiyoti va diplomatiya universitetini, 2000-yil Buyuk Britaniyaning Birmingem universitetini tamomlagan. Mutaxassisligi iqtisodchi, iqtisod fanlari nomzodi, dotsent. U 2019-yilda “Sodiq xizmatlari uchun” medali bilan taqdirlangan. 2021-yilning fevralida Ekopartiya raisi etib saylangan. Undan avval Ekologiya va atrof muhitni muhofaza qilish davlat qo‘mitasida rais o‘rinbosari bo‘lgan, undan ham avval esa Prezident administratsiyasi Xalq qabulxonasi faoliyatini nazorat qilish va muvofiqlashtirish bo‘limini boshqargan.