O‘zbekiston Respublikasi Prezidentligiga “Milliy tiklanish” demokratik partiyasi Markaziy kengashi raisi Alisher Qodirov nomzodi syezd delegatlarining ko‘pchilik ovozi bilan tasdiqlandi. Bu haqda 26-avgust kuni “Milliy tiklanish” demokratik partiyasining VII qurultoyida ma’lum qilindi.

Foto: “Daryo” / Madina Nurman

Ma’lum qilinishicha, qurultoyda Alisher Qodirov “Qadriyatlarga tayangan taraqqiyot!” g‘oyasiga asosan 5 ta ustuvor yo‘nalishdan iborat saylovoldi dasturini e’lon qildi.

Unga ko‘ra, dasturda asosiy e’tibor milliy hamda umuminsoniy qadriyatlar negizida milliy tarbiya va ta’lim tizimini shakllantirishga qaratilgan. Xususan:

  • “Yangi avlod” davlat dasturi qabul qilinadi. Bola tug‘ilganidan to maktabni tugatgungacha bo‘lgan davrni o‘z ichiga olgan yagona tarbiya va ta’lim tizimi yaratiladi. Oila – bog‘cha – maktab bir tizimda birlashtiriladi.
  • Oliy ta’lim vazirligi tugatiladi. O‘rniga O‘zbekiston Respublikasi Prezidenti huzurida Rektorlar kengashi tashkil etiladi. Oliygohlar o‘zini o‘zi boshqaradi va raqobatbardosh bo‘lish uchun kurashadi.
  • Parlamentda deputatni emas, partiyani kuchli qiladigan tizim yaratiladi. Vakillik organlariga saylovlarda mоjаritar va proporsional tizimlardan foydalaniladi. Mojaritar, proporsional saylov tizimini joriy qilish orqali partiyalarning parlamentdagi rolini kuchaytirishga erishiladi. Qonunchilik palatasidagi deputatlar soniga muvofiq, vazirliklar portfeli taqsimlanadi.
  • Sud-huquq tizimida islohotlar o‘tkaziladi. Jazoni ijro etish muassasalari Ichki ishlar vazirligidan Adliya vazirligiga o‘tkaziladi. Jazoni ijro etish muassasalaridan jazoni o‘tab, ozodlikka chiqqan fuqarolarning jamiyatga tez va samarali moslashishiga erishiladi.
  • Imtiyozlar va preferensiyalar istisnosiz qonun bilan belgilanadi. Iqtisodiyotda teng imkoniyatlar va teng sharoitlar bo‘lishiga erishiladi. Prezident qarorlari bilan imtiyozlar va preferensiyalar berishga chek qo‘yiladi. Ushbu masala istisnosiz qonun bilan tartibga solinadi.
  • “Islom dini – ma’rifat manbai” dasturi qabul qilinadi. Islomiy ta’lim muassasalariga qabul kvotalari oshiriladi. Qur’on kurslari ommalashtiriladi. Dinshunoslik sohasida ilmiy ishlar rag‘batlantiriladi.
  • Qadriyatlarga hurmatsizlik uchun javobgarlik belgilanadi. O‘zbekiston Respublikasi Konstitutsiyasida milliy urf-odatlar, an’analar va xalqimizda shakllangan qadriyatlarga nisbatan hurmatsizlik uchun ma’muriy javobgarlik belgilanadi.
  • So‘z erkinligi va jamiyatni demokratlashtirish davom ettiriladi. OAV qo‘shimcha qiymat solig‘idan ozod qilinadi. 50 ming ovoz jamlagan murojaat bo‘yicha Prezidentning OAVda shaxsan munosabat bildirishiga oid tizim yaratiladi.
  • Aliment fondi tashkil etiladi. 3 oy ichida to‘lanmagan alimentlar fond tomonidan to‘lanadi va aliment to‘lovchining ozodligini cheklash yoki mehnatga majburlash orqali qoplanadi.
  • Jahon savdo tashkilotiga a’zo bo‘lish tezlashtiriladi. Markaziy Osiyo keng qamrovli integratsion hamkorlik maydoniga aylantiriladi. “Xorijdagi o‘zbeklar muloqot klubi” tashkil qilinadi.

Eslatib o‘tamiz, “Milliy tiklanish” demokratik partiyasi tomonidan partiya yetakchisi Alisher Qodirov  nomzodi 6-avgust kuni prezidentlik saylovida qatnashish uchun tavsiya qilingan.

Ijtimoiy tarmoqlarda maktablardagi o‘qituvchi va targ‘ibotchilar “Milliy tiklanish” DP tomonidan prezidentlikka nomzod Alisher Qodirovni qo‘llab-quvvatlashga doir imzo varaqasini uyma-uy yurib, to‘ldirishlari talab qilingani aytilgan xabar tarqalgandi. Alisher Qodirov bunga munosabat bildirib, Prezidentlikka nomzodlarni qo‘llab-quvvatlash uchun imzo yig‘ishda majburlashga yo‘l qo‘yib bo‘lmasligini, yuqoridagi holat qaysi tumandagi qaysi maktabda sodir bo‘lgani aniqlanishi va bu tasdiqlansa, ushbu imzo varaqalari umumiy ro‘yxatdan chiqarib tashlanishini bildirdi.

Ma’lumot uchun, Alisher Qodirov 1975-yilda tug‘ilgan. 1996-yilda Egey universitetini (Turkiya), 2009-yilda Toshkent moliya institutini (sirtdan) va 2011-yilda O‘zbekiston Prezidenti huzuridagi Davlat boshqaruvi akademiyasini tamomlagan.

2015-yildan beri deputatlik faoliyatini yuritayotgan Alisher Qodirov 2019-yilning may oyida partiya raisligiga saylangan. Unga qadar Respublika Ma’naviyat va ma’rifat markazi rahbari sifatida mehnat qilgan.