29 август куни Мексика кўрфази соҳилига «Ида» бўрони кириб келди. Дастлаб, шамол тезлиги соатига 240 километрга етган, бўрон хавфлилик даражаси бўйича бешта тоифанинг тўртинчиси. Табиий офат туфайли АҚШнинг Луизиана штатида 1 миллиондан ортиқ аҳоли электр энергиясидан узилиб қолди, бир киши вафот этди, Миссисипи дарёсининг йўналиши тескари томонга бурилди. Бўрондан кейин Луизиана штати қандай кўринишга келгани ҳақида «РБК» фоторепортаж тайёрлади.
«Ида» — Америка тарихидаги энг кучли бешинчи бўрон. АҚШ президенти Жо Байден фалокат оқибатлари аянчли бўлиши ва у инсонлар ҳаётига хавф туғдириши ҳақида олдиндан огоҳлантирган. Атлантика океанида вужудга келган «Ида» бўрони Американинг Луизиана штати соҳилларига етиб келган. Штатнинг энг гавжум шаҳри Нью-Орлеан бутунлай электрсиз қолди. Entergy энергетика компаниясининг маълум қилишича, узилиш электр узатиш линияларининг «қаттиқ шикастланиши» билан боғлиқ.
Полиция довулнинг биринчи қурбони ҳақида хабар берди — бир одамнинг устига дарахт қулаб тушган. Штат бўйлаб сув тошқини ва вайронагарчилик қайд этилган; шамол туфайли қулаган дарахтлар кўплаб автомобиль йўлларини тўсиб қўйган.
Электр энергияси муаммоси туфайли шифохоналар захира генераторлари қувватидан фойдаланишга мажбур бўлмоқда. Маҳаллий метеорология хизмати аҳолини уйда қолишга ва заруратсиз кўчага чиқмасликка чақирди.
«Биз олдин ҳам сув тошқинларидан азият чекардик. Бўронлардан ўтишга мажбур бўлганмиз. Лекин умримда бундай сувни кўрмаганман. Бўрон шунчалик кучли бўлдики, ҳамма жойни бутунлай вайрон қилди, бизга ўта ёмон зарба берди», — деди Ню-Орлеан жанубидаги Жин Лафитт шаҳри мери Тим Карнер CNN’га.
Ажабланарлиси шундаки, бундан 16 йил олдин худди шу кунда Луизиана штатига Катрина довули кириб келган эди. «Ида» бўрони Катрина биринчи марта зарба берган жойдан 72 километр узоқликда бошланди. «Ида» 2005 йилдан буён кузатилган энг кучли довул. Катрина туфайли 1,8 мингдан ортиқ одам вафот этганди. Ҳозирда довул пасайган бўлса-да, метеорологлар яқин кунларда Луизиана штатида кучли ёмғир ёғиши мумкинлигини ҳамда сув тошқини хавфи давом этиши ҳақида огоҳлантирмоқда.
Бўрондан сўнг кўплаб вайронагарчиликлар қайд этилган, бироқ зарарнинг умумий миқдори ҳозирча номаълум. Маҳаллий ҳукумат маълум қилишича, «Ида» довули ўта тез кучайгани сабабли ҳукумат 390 минг кишини умумий эвакуация қилишга улгурмаган.
Нью-Орлеан мэри аҳолини ўзини-ўзи эвакуация қилишга ёки электр таъминотидаги узилишларга тайёр туришга чақирди. Довул штатнинг иккита йирик шаҳри — Нью-Орлеан ва Батон-Руж устига ёғилди.
Изоҳ (0)