ТОLО ахборот тармоғининг бошловчиси, аввалроқ «Толибон»нинг юқори мартабали вакилидан интервью олган афғонистонлик журналист аёл Бехешта Аргханд «Толибон»дан қўрқиб, мамлакатдан қочиб кетди. Бу ҳақда CNN хабар берди.
«Мен мамлакатни тарк этдим, чунки миллионлаб одамлар сингари мен ҳам ‘Толибон’дан қўрқаман», — деди журналист CNN’га.
«Толибон» Кобулда ҳокимиятни қўлга киритгандан сўнг, ҳаракатнинг юқори лавозимли вакили Абдулҳақ Ҳамад журналист аёлга жонли эфирда интервью берганди. Бу интервью дунёнинг етакчи оммавий ахборот воситалари эътиборини тортди ҳамда «Толибон» аёлларнинг ишлаш ҳуқуқини чекламасликка тайёр эканига бир рамз бўлди.
Бироқ икки кундан кейин Аргханд «Толибон»нинг суиқасдидан омон қолган фаол Малала Юсуфзай билан суҳбатлашган. Бу Юсуфзайнинг Афғонистон телевидениесига берган биринчи интервьюси эди. Аргханднинг барча уринишларига қарамай, интервью эфирга узатилмади.
Журналист кўплаб ҳамкасблари ва оддий афғонистонликлар дуч келаётган хавф туфайли Афғонистонни тарк этишга қарор қилган. Аввалроқ ТОLО янгиликлар телеканали раҳбари Мирака Попал «Толибон» аёлларга теледастурлар олиб боришга рухсат бергани ҳақида твит қолдирганди.
Афғонистонда ҳукумат тепасига «Толибон» ҳаракати вакиллари келганидан кейин маҳаллий аёлларнинг жангарилардан қочиши, уларнинг таъқибидан хавотирга тушиши, хотин-қизлар таълими ва уларнинг ишлаши бўйича хавотирлар пайдо бўлган. «Толибон» аввал, яъни 1996–2001 йилларда Афғонистонни бошқарган даврда аёлларни бошидан тўпиғига қадар тўлиқ ёпиб турувчи махсус кийимда паранжи ёпиниб юриши мажбурий деб белгиланган, аёлларнинг ишлаши, ўқиши, уйдан маҳрам эркак ҳамроҳисиз чиқиши тақиқлаб қўйилган ва ушбу қоидаларни бузганлар тошбўрон қилиб ўлдирилган.
Ҳокимиятга келганидан кейинги биринчи матбуот анжуманида «Толибон» вакили аёлларга «ислом қонунлари доирасида» ишлашга, ўқишга ва жамиятда иштирок этишга рухсат берилишини айтганди. Шунингдек, вакилга кўра, журналистлар ҳодисаларни танқид қилиши мумкин бўлади.
«Толибон» «аёллар ҳуқуқларини ҳурмат қилишини» ва агар паранжи кийса, уларга ишлаши ва ўқиши учун рухсат беришни ваъда қилган. БМТ Хавфсизлик кенгаши янги Афғонистон ҳукуматини аёллар иштирокида тузишга чақирган. «Толибон» вакили Энамулла Саманганий Афғонистон давлат телевидениесидаги чиқишида аёлларни мамлакат раҳбариятига жалб этиш эҳтимолини истисно қилмади.
Шу билан бирга, «Толибон» матбуот котиби Забиҳулла Мужоҳид афғон аёлларини ўз хавфсизлиги учун уйдан чиқмасликка чақирди. Унинг сўзларига кўра, жангариларга ҳали «аёллар билан қандай мулоқот қилиш ўргатилмаган».
Мавзуга доир: Афғонистонда паранжи нархи ўн баравар ошиб кетди
Изоҳ (0)