Жанубий Африка Республикасининг бир қатор провинцияларига совуқ оқим урилиб, камдан кам учрайдиган кучли қор ёғиши ҳолатини келтириб чиқарди. Шунингдек, шимоли-ғарбдан тезлиги соатига 80 километргача бўлган кучли шамоллар кириб келди.
Жанубий яримшарда ҳозир қиш бўлишига қарамай, бундай об-ҳаво шароити Жанубий Африка Республикасига хос эмас. Маҳаллий аҳоли, айниқса, болалар ушбу имкониятдан фойдаланиб, Кейптаундан тахминан 180 километр узоқликда жойлашган Сирес шаҳри яқинида тоғлар ва тоғ чўққиларидаги қордан баҳраманд бўлмоқда.
Бу ЖАРда сўнгги ойларда ёғган биринчи қор эмас. Июль ойининг охирида Африканинг жанубига ҳақиқий қиш келган. Метеорологларга кўра, бунга Антарктидадан келган циклон сабаб бўлган. Шаҳарларга қор ёғиб, термометр устунлари деярли мунис 10 даражага тушиб кетган. Шу тариқа ЖАРда энг паст ҳарорат бўйича тарихий рекордлар янгиланган. Совуқ тахминан бир ҳафта давом этган.
Аввалроқ Антарктидада «яшил қор» пайдо бўлгани, Мексикада коронавирус шаклидаги дўл ёғгани, Қозоғистон ва Қирғизистоннинг айрим ҳудудларида саратонда кучли қор ёғгани ҳақида хабарлар берилганди.
Изоҳ (0)