Америка ҳарбийлари мамлакатни тарк этгач, «Толибон» ҳаракати Афғонистоннинг тўлиқ мустақилликка эришганини эълон қилди, деб ёзади Al Jazeera.
Телеканал мухбири хабарига кўра, Кобулда «Толибон» чет эл қўшинларининг узил-кесил жўнаб кетганини байрам қилиб, ҳавога ўқ узган.
«Толибон» вакили Забиҳулла Мужоҳид Афғонистон Америка қўшинлари чиқиб кетганидан кейин мустақил бўлганини эълон қилди. «Бугун Афғонистон вақти билан ярим тунда Америка қўшинлари Кобул аэропортини тарк этди ва бизнинг мамлакатимиз тўлиқ мустақилликка эришди», — деб ёзди «Толибон» вакили Twitter’да.
CNN хабарига қараганда, «Толибон» жангарилари Кобулда автоматик қуролдан салютлар отган. Шаҳарда автоматдан отилган ўқ овозлари эшитилиб, осмонда ҳавода из қолдириб учаётган ўқлар кўринган.
LA Times хабар қилишича, «Толибон» америкаликларнинг Афғонистондан чиқиб кетишини нишонлаб, уларнинг формаларини кийиб кўрган, техникасини ўрганган, қўшиқ куйлаб, ҳавога ўқ узган.
Забиҳулла Мужоҳид АҚШнинг эвакуация бўйича операцияси якунланганидан кейин «Толибон» назорати остига ўтган Кобул аэропортининг учиш қўниш йўлагида туриб: «Афғонистонни табриклайман! Бу ғалаба барчамизники», — дея журналистларга маълум қилган.
Шу билан бирга, Мужоҳид: «Биз АҚШ ва бутун дунё билан яхши алоқаларда бўлишни истаймиз. Барча билан яхши дипломатик алоқалар ўрнатилишини маъқуллаймиз», — дея қўшиб қўйди.
«РИА Новости» ёзишича, «Толибон» вакили АҚШ Афғонистонда ўз мақсадларига эриша олмагани ва мағлубиятга учраганини маълум қилди.
Америка армияси ўз контингентини Афғонистондан олиб чиқишни якунлади. АҚШнинг Афғонистондаги ҳарбий миссияси қарийб 19 йил-у 11 ой давом этди. Америка қўшинлари мамлакатга 2001 йил 11 сентябрда Нью-Йорк ва Вашингтонда терактлар уюштирган «Ал-Қоида» билан курашиш учун келган эди. Бу АҚШ тарихидаги энг узоқ давом этган уруш бўлди. Унда 2400 дан ортиқ Америка ҳарбий хизматчилари ҳалок бўлди, яна 20 мингдан ортиғи яраланди. Ушбу миссия АҚШга 1-2 триллион долларга тушган.
Изоҳ (0)