Баъзида харид қилишдан аввал яхшилаб кўздан кечирилганига қарамай, уйга олиб келиб кесилганидан кейин тарвузнинг бемаза эканига гувоҳ бўлиш мумкин. Мазаси ширин эмаслиги етмагандек, яхши етилмаган ҳам бўлса ейишга бўлган хоҳиш сўнади. Аммо ташлаб юборишга ҳам кишининг кўзи қиймайди. Бундай вақтда нима қилиш кераклиги ҳақидаги тавсияни эътиборингизга ҳавола қиламиз.
Тарвузнинг ички қисмини ўйиб олиб турли ичимликлар — лимонад, коктейл, пўстидан эса мураббо тайёрласа бўлади. Бунинг учун ичи ўйилган тарвуз пўстини яшил қисмидан артиб тозалаш керак. Кейин эса 3,5 см қалинликда кесиб чиқиш керак. Қайнаган сув солинган идишга солиб, 10 дақиқа давомида қайнатиш керак. Алоҳида шакарли қиём тайёрлаб олиш ҳам керак бўлади. Қайнаб чиққан тарвузни қиёмга қўшинг. 20 дақиқа қайнаб чиққанидан кейин оловни ўчириб, 2-3 соат давомида совитинг. Таъбга кўра қирғичдан чиқарилган лимон пўстини ҳам қўшса бўлади.
Бундан ташқари, тарвузни тузлаш мумкин. Бу жараён худди бодрингники сингари бўлади. Бунинг учун пўсти билан бирга бўлакларга бўлинган тарвуз 3 литрли банкага солинади. Бир қошиқ туз ва уч қошиқ шакар солгандан кейин, 75 грамм 9 фоизли сирка қўшилади. Қайнаган сув солиб, устини сочиқ ёки дока билан ёпиб қўйиш керак. Бир неча кун давомида хона ҳароратида сақлашга тўғри келади. Кейин эса совиткичда музлатиб, газак сифатида истеъмол қилса бўлади.
Изоҳ (0)