Қозоғистоннинг Жамбил вилоятида портлаш содир бўлди. Мамлакат Мудофаа вазирлиги берган хабарга кўра ҳарбий омборлардан бирида ёнғин кузатилган, деб ёзмоқда Tengrinews.
Портлаш ва улкан ёнғин ҳодиса гувоҳи бўлган кишилар томонидан видеотасвирга туширилган.
«Тараз йўлида ҳарбий омборлардан бири ёнмоқда. Портлашнинг зарб тўлқини машинада кетаётган вақтимда ҳам сезилди», — деб ёзган ижтимоий тармоқларда гувоҳлардан бири.
«Жамбил вилоятининг Байзак туманида жойлашган ҳарбий қисмда маҳаллий вақт билан, тахминан, соат 19:00 да ёнғин кузатилган. Ёнғин оқибатида номаълум предметлар портлаб кетган. Оловни ўчиришга ёнғин ўчириш гуруҳлари ўз махсус транспорти билан жалб қилинган. Уларга Жамбил вилоятидаги Фавқулодда вазиятлар департаментининг ёнғинни ўчириш бўлинмалари кўмак берган», — дейилади Қозоғистон Мудофаа вазирлиги баёнотида.
Хабарларга кўра, ёнғин ўчоғини бартараф этиш ишлари давом этмоқда. Ҳодисанинг келиб чиқиш сабаблари ҳам ўрганилмоқда.
«Ҳодиса юз берган жойга мудофаа вазирининг ўринбосари, генерал-лейтенант Руслан Шпекаев раҳбарлигидаги вазирлик комиссияси юборилган», — дея қўшимча қилган вазирлик вакили.
Спутник хабарига кўра, Қозоғистон Мудофаа вазирлиги томонидан портлаш юз берган ҳудуддаги аҳолини эвакуация қилиш ишлари бошланган. Ҳарбий қисм омборидаги ўқ-дорилар инженерлик қуроллари ва узоққа учадиган хусусиятларга эга эмас.
2019 йил 24 июнда Туркистон вилоятида тарқатиб юборилаётган ҳарбий қисм жойлашган ҳудудда бир нечта портлашлар кузатилганди. Қуролли Кучлар арсеналининг бирида олов чиққан, оқибатда ҳарбий қисм ҳудудидаги ўқ-дорилар портлаганди. Шаҳар аҳолиси хавфсиз жойга эвакуация қилинган, ҳодиса оқибатида тўрт киши ҳалок бўлганди. Ўзбекистон ТИВ Арисдаги мазкур портлашлардан кейин ҳалок бўлганлар орасида ўзбекистонликлар йўқлигини билдирган.
Изоҳ (0)