«Толибон» вакиллари ва Панжшердаги қаршилик кучлари бир-бирига ҳужум қилмасликка келишиб олди. Бу ҳақда Покистоннинг GEO TV телеканали хабар берди. Икки делегация ўртасидаги учрашувлар сўнгги икки кун давомида Афғонистоннинг Парвон вилояти Чорикор шаҳрида бўлиб ўтди.
Сулҳ ҳақида қўшма матбуот анжуманида эълон қилиниши кутилмоқда. Келишув «Толибон» ҳукмронлиги остида бўлмаган ягона вилоят Панжшердаги тўқнашувларнинг олдини олишга ёрдам беради.
Аввалроқ Панжшердаги қаршилик кучлари етакчиси Аҳмад Масъуд «Толибон» билан музокаралар бошланишини кутаётганини билдирганди. У мулоқотга тайёр эканини айтган ва музокараларда Россиянинг воситачилик қилишига умид билдирган. Мавжуд маълумотларга кўра, қаршилик кучлари таркибида 10 минг аскар бор, улар орасида ҳукумат қўшинларининг мунтазам бўлинмалари ҳарбийлари, шунингдек, оғир қуроллар мавжуд.
«ТАСС» хабар беришича, «Толибон» жангарилари Афғонистондаги Миллий ярашув Олий Кенгаши раҳбари Абдулла Абдулла ва мамлакат собиқ президенти Ҳамид Карзайни қўриқчилардан маҳрум қилди.
CNN манбасига кўра, 23 август куни «Толибон» Карзайнинг машиналарини мусодара қилган ва унинг тансоқчиларидан қурол-яроғларини олиб қўйган. Шундан сўнг собиқ давлат раҳбари Абдулла Абдулланинг уйига кўчиб ўтган. Абдулланинг уйида эса 25 август куни тинтув ўтказилган. Натижада ҳукуматни «Толибон»га тинч йўл билан топшириш бўйича Мувофиқлаштирувчи кенгашнинг бу иккала аъзоси қўриқчисиз қолди.
CNN таъкидлашича, Карзай ва Абдуллани уй қамоғида деса ҳам бўлади.
«Толибон» пойтахтга киргач, Абдулла Абдулла ва Ҳамид Карзай Ислом партияси раҳбари Гулбиддин Ҳикматёр билан биргаликда Мувофиқлаштирувчи кенгаш тузганди. Улар янги ҳукумат органларини тузиш мақсадида ҳаракат вакиллари билан бир қанча учрашувлар ўтказди. Аrianа News телеканали «Толибон» тузмоқчи бўлган Афғонистон бошқарув кенгаши таркибидан бу уч сиёсатчи ҳам ўрин олиши ҳақида хабар берганди.
Изоҳ (0)