АҚШ разведкаси Байденга коронавирус келиб чиқиши тўғрисидаги махфий ҳисоботни топширди. Улар якуний хулосага кела олмаган

АҚШ разведка хизмати президент Жо Байденга коронавируснинг келиб чиқиши ҳақидаги махфий ҳисоботни тақдим этди, деб ёзади The Washington Post.

Нашрнинг қайд этишича, ҳисобот хулосалари «тугалланмаган». COVID-19 ҳайвондан юқа бошлаганми ёки одамданми, вирус табиий келиб чиққанми ёки Ухандаги лабораторияда яратилганми — разведка хизматлари етарлича маълумот топа олмади.

Нашр манбаларидан бирининг айтишича, разведка хизмати «бу масалани ҳал қилиш учун яхши тайёргарликка эга бўлмаган», вируснинг келиб чиқишини биринчи навбатда разведка ходимлари эмас, балки олимлар аниқлаши керак.

Ҳисобот бир неча кун ичида қисман эълон қилиниши кутилмоқда.

Ҳисоботнинг ўзи Байденнинг ташаббуси билан май ойида бошланган 90 кунлик текширув натижасидир.

Август ойининг ўрталарида CNN манбаларга таяниб, Америка разведкаси коронавирус келиб чиқишининг сабабларини икки ойдан ортиқ ўрганиб чиққанидан сўнг вирус лабораторияда ишлаб чиқилганми ёки табиий равишда пайдо бўлганми, деган версияларда ягона тўхтамга кела олмагани ҳақида хабар берганди. Текширув жараёнидан хабардор манбалардан бирининг таъкидлашича, ҳисоботнинг янги версиясида «ғайриоддий нарса йўқ».

АҚШ президенти Жо Байден май ойининг охирида АҚШ разведка ҳамжамияти COVID-19 қандай тарқала бошлагани тўғрисида етарлича аниқ маълумотга эга эмаслигини айтган. Байден разведка хизматларига 90 кун ичида барча мавжуд маълумотларни ўрганиш ва унга янги ҳисобот тайёрлаш бўйича саъй-ҳаракатларни икки баравар оширишни буюрган.