Бугунги кунда ижтимоий тармоқлар ҳамда аҳоли орасида коронавирусга қарши вакциналар хавфсизми, таркибида инсонга зарар етказадиган кимёвий моддалар борми, деган саволлар пайдо бўлмоқда. Санитария-эпидемиология хизмати бунга жавоб берди.
«Йўқ. Биздаги мавжуд вакциналар хавфсиздир. Вакциналар таркибига кирувчи барча компонентлар ушбу дозанинг ичида бўлган ҳар қандай нарса одамлар учун хавфсиз бўлишини таъминлаш учун синчковлик билан синовдан ўтказилади.
Дарҳақиқат, вакциналар таркибида турли хил элементлар мавжуд ва уларнинг ҳар бири синовдан ўтказилади. Одамларни эмлашни бошлашдан олдин улар ҳайвонлар, шу жумладан, бирор-бир муаммонинг мавжудлигини текшириш учун синовдан ўтказилади. Шундан кейингина вакциналар одамларгача етиб бориб, кўнгиллиларда синовдан ўтказилади. Вакциналар кенг жамоатчилик орасида ишлатилишига рухсат берилишидан аввал клиник синовлар ўн минглаб одамларда ўтказилди. Хавфсизлик эса ушбу клиник синовларнинг энг муҳим қисмидир. Ҳар бир вакцина одамларда ишлатилишидан олдин унинг хавфсизлигини таъминлаш мақсадида хавфсизлик текширувидан ўтади», — дейилади Санитария-эпидемиология хизмати жавобида.
Бундан ташқари, вакциналарни ишлаб чиқариш жараёнида сифат назорати доимий равишда амалга оширилиши, шунинг учун вакцинанинг таркибига кирувчи ҳар бир ингредиентнинг энг сифатли ва одамлар томонидан фойдаланиши учун хавфсиз бўлиши кафолатланиши қўшимча қилинган.
Соғлиқни сақлаш вазирлиги маълумотларига кўра, 23 августга келиб Ўзбекистонда жами 12 831 577 доза вакцинадан фойдаланилган бўлиб, шу кунгача тўлиқ эмланган фуқаролар эса 1 494 680 нафарни ташкил қилмоқда. Мамлакатда жами вакцина захираси 17 миллион 856 минг 540 дозани ташкил қилмоқда.
Изоҳ (0)