Қарши туманидаги 6-мактаб директори ўқитувчиларни мажбурий меҳнатга жалб қилгани учун вазифасидан озод этилди. Бу ҳақда «Адолат» СДП Қарши туман кенгаши раиси Юлдуз Муҳаммадиева маълум қилди.
Эслатиб ўтамиз, Қашқадарё вилоятининг Қарши туманидаги 6-мактаб директори Феруза Аҳмедова мактаб ўқитувчиларини мажбурий меҳнатга жалб қилгани айтилган видеолавҳа тарқалганди. «Дарё» мухбири билан суҳбатлашган ўқитувчи мажбурий меҳнат ишларига 40 нафарга яқин эркак ўқитувчи ва 10—15 нафар аёл ўқитувчи жалб этилганини, улар орасида пенсия ёшига етиб қолган, оғир меҳнатдан толиқиб қоладиган ўқитувчилар ҳам борлиги, аммо директор бунга эътибор ҳам бермаётганини айтганди.
Вилоят Халқ таълими бошқармаси ишчи гуруҳ тузилиб, вазият мутасаддилар иштирокида ўрганилгандан сўнг мактаб директорининг хатти-ҳаракатига қонуний баҳо берилишини маълум қилганди. Адолат» СДП Қарши туман кенгаши раисининг билдиришича, 21 август куни Халқ депутатлари Қарши тумани кенгашининг навбатдаги сессиясида ушбу масала кўриб чиқилди.
Унга кўра, депутатлар Қашқадарё вилояти ХТБнинг хати ҳамда депутатларнинг таклифларини инобатга олиб, мактаб директорининг лавозимидан озод этилишига розилик берган. Шунингдек, Феруза Аҳмедова келгусида халқнинг ҳақли равишда норозилигини келтирувчи ёки депутатлик мақомига путур етказувчи ҳолатларга йўл қўйган тақдирда депутатлик ваколатини муддатидан илгари тугатиш белгиланди.
Қашқадарё ҳокими Зоир Мирзаев 23 август, душанба куни бўлиб ўтган аппарат йиғилишида Қарши шаҳрида мажбурий меҳнатга йўл қўйган мактаб директорини ишдан олиш ҳақида топшириқ берганди. Шунингдек, вилоят ҳокими Халқ таълими бошқармаси бошлиғига мажбурий меҳнатга йўл қўйган мактаб директори ишдан олинмаса, шаҳар халқ таълими бўлими раҳбарини ҳам ишдан олишини билдирган.
«Бугуноқ мактаб директори ишдан олинсин, агар ишдан ололмасанглар, менга олиб келинг. Мен ҳам мактаб директорини, ҳам шаҳар халқ таълими бўлими раҳбарини белгиланган тартибга бўйсунмагани учун ишдан оламан», — деган эди вилоят раҳбари.
Эслатиб ўтамиз, вилоят Халқ таълими бошқармаси масъуллари мажбурий меҳнатга йўл қўйилгани хабар берилган Қарши шаҳридаги 31-умумий ўрта таълим мактабидаги ҳолатни ўрганиб чиқиб, директорга Меҳнат кодексининг 181-моддасига асосан ҳайфсан интизомий жазо чорасини қўллаш билан чекланганди. Ундан аввалроқ эса вилоятнинг Қарши туманидаги 6-мактабда ҳам мажбурий меҳнатга йўл қўйилгани, мажбурий меҳнатга йўл қўйиб, ортида туман ҳокими ва туман халқ таълими бўлими раҳбари турганини айтган мактаб директорига эса ҳалигача чора кўрилмагани хабар қилинганди.
Изоҳ (0)