Ayrimlar koronavirusga qarshi qo‘llanilayotgan ba’zi vaksinalar tarkibida harom narsalar borligini aytmoqda. Shunday vaksinadan foydalanish mumkinmi? O‘zbekiston musulmonlari idorasi Fatvo hay’ati bunga javob berdi.

Fatvo hay’ati javobida ta’kidlanishicha, vaksina tarkibida harom mahsulotlar borligi haqidagi gaplar hech qanday ilmiy dalillar bilan isbotlanmagan. Mabodo vaksina tarkibida shunday qo‘shimchalar bo‘lgan taqdirda ham, u moddalar kimyoviy reaksiyalar natijasida o‘z aslini butunlay yo‘qotgan bo‘lsa, uning haromligi qolmaydi va undan foydalanish joiz bo‘ladi.

“Buni shariatimizda istihola (ya’ni, bir modda butunlay tarkibi o‘zgarib, boshqa narsaga aylanib ketishi) deyiladi. Shu qoidaga binoan, dorilar tarkibida o‘z asli — haromligini yo‘qotgan moddalar bo‘lsa-da, ulardan foydalanish mumkin.

Qolaversa, Misrdagi ‘Dorul-ifto’ fatvo uyushmasi, Birlashgan Arab Amirliklaridagi Islomiy ishlar idorasining Shar’iy fatvo kengashi va dunyodagi boshqa yirik fatvo hay’atlari koronavirusga qarshi vaksinalarda harom hukmidagi mahsulotlar qo‘shilgan bo‘lsa ham istihola qoidasiga binoan musulmonlar uchun emlanish joiz bo‘lishi haqida fatvo chiqarganlar. Vallohu a’lam”, — deb ta’kidlangan Fatvo hay’ati javobida.

Bundan avval O‘zbekiston musulmonlari idorasi vaksina olishning hukmini tushuntirgandi.